السبت، 3 مايو 2008

أنا من هنا!!!

أنا من هنا
آه وربنا..
أنا من هنا
من عندنا
عايش هنا من كام سنه
ومانيش عبيط
ولا م الهبل عندي أنا
ولا دماغي مجننه
لكن أنا
أنا من هنا
***
مستغربين؟!!!
إني مرفرفتش بعيد..
زي الطيور
إني مفكتش الحديد
ولا عمري يوم عديت بحور
ولا قلت يوم إني حزين
مع إني معرفتش سرور
ولا يوم شكيت...
ولا يوم رضيت إني أثور
ولا يوم دخلت المعركه
ولا كنت غاوي دربكه
ولا كنت عاوز إني يوم
يبقى ما بيني وبينكو سور
رغم اللي بيا
واللي طول عمره عليا
رغم إني عايش قول كده زي الحمار
أو زي ما في الساقيه طور
برضه رفضت إني أثور
أصل أنا يا عمنا
أنا من هنا
ولزومها إيه العكننه
خليك كده هادي ولطيف
خليك كده بطبعك خفيف
خليك ظريف
مالك ومال الزرجنه
دي مكانها يا ابني مش هنا
وأنا من هنا
***
لساكوا برضه مبرقين؟!!!
مستغربين؟!!!
طب ليه كده؟!!
ما أديني عايش والسلام
وعيشتي أهه فل و تمام
ماشي ودايس في العلام
وهي دي نهاية العلام
في حالي..
طال بيا السكات
صهينت وسمعت الكلام
مهو إنت عارف
طول ما انت متكلين وشيك
ماشي لا ليك ولا كان عليك
ودماغك الحلوه الكبيره
مليانه ياما حاجات كتيره
كوره وغنا ورقص وشاكيرا
هتبقى عال
هتعيش وهتربي العيال
هتعيش تمام
وتموت تمام
وهيضربوا بكره لجنابك
ألف ميت مليون سلام
طب وانت عاوز حاجه تانيه؟؟
كده رضا
تاكل وتشرب تنبسط
واخر النهار تدخل تنام
آه يا سلام!!!
والا انت نفسك قول في إيه؟؟؟
حريتك؟
وطنيتك؟
تعرف توصل كلمتك؟
تحفظ كرامتك عندنا؟
وتعيش براحتك وسطنا؟
تعرف تحقق رغبتك؟
يا عم روح
باين عليك يا عمنا مش من هنا
بطل غباوه يا عمنا
ده طمعكوا ده خلى الفلوس زي الحمام
جابلي الصداع وضغط عالي
وفي عز صيف يا عمنا جابلي زكام
اسمع هاقولك كلمتين
عاوز تعيش هنا وسطنا
عيش زينا
زيي أنا
هافضل كده زي ما انا
مليش مزاج للزرجنه
باسكت...
وأموت في الصهينه
وأشكي همومي لربنا
باشكي في سري هس هس
ولا حد يوم يسمعلي حس
لو يعلى صوتي باقوله بس
أصلي أنا
خايف لييجوا عندنا
وتبقى عيشه مطينه
وأفضل في ذل وعكننه
لا يا عمنا
أنا من هنا
هافضل كده زي ما انا
وانت يا تبقى زينا
يا تروح تعيش في حته تانيه
غير هنا!!!