الثلاثاء، 19 أغسطس 2008

قانون "اللا مرور" الجديد!!!



من فتره قصيره..طلعتلنا حكومتنا الموقره بقانون جديد للمرور..وزي ما شفنا فالقانون الجديد خد أكتر من حقه في الدعايه والإعلان لحد ما حفظنا إعلاناته بداية من الإعلان اللي بيظهر الشارع المصري في أسوأ صوره مرورا بإعلان يسرا وهشام سليم واللي كان في خلفيته عربيه بيجو سبور ملهاش حل (أنا مأخدتش بالي أساسا غير من العربيه في الإعلان ده) وانتهاء بالإعلانات اللي فيها حوادث وإصابات ووفيات..

المهم..القانون دخل حيز التنفيذ بداية من شهر 8/2008 ..(خليكوا فاكرين التاريخ ده يوم تاريخي) .. خلاص مفيش مشكله..الحكومه عملتلنا قانون جديد علشان مصلحتنا..أوك..تعالى بأى اتفرج على القانون اللي كان همه الأكبر إثراء خزينة الدوله بزياده غريبه في غرامات المخالفات..لأ والأنيل من كده الحبس..وتخيل مثلا لو انت دكتور والا مهندس والا حتى بتاع بليله بس مواطن صالح..تخيل إن الحكومه ممكن في لحظات ترتبلك رحله ممتازه إلى ليمان طره لقضاء أسعد اللحظات مع اللصوص والمجرمين..طب ما الحكومه فيها الخير..وضبتلك رحله مكنتش تعرف تطلعها حتى لو انت مليونير..يعيش الحكومه!!!

طبعا الساده المسئولين – المحترمين جدا لا مؤاخذه – بيقولوا للمواطن الصالح اللي هو حضرتك متخافش من القانون الجديد طول ما سيادتك – شوف الإحترام والتقدير – ماشي في السليم...أنا بس اللي مزعلني انهم مقالوش ألاقي فين السليم ده علشان أمشي فيه ؟!!!

أساسا أيها الساده – المحترمين جدا لا مؤاخذه – طول ما العساكر واقفه في الشارع ومعاها دفاتر عاوزه تملاها فأنا مش هلاقي سليم أمشي فيه وكده كده النمره هتتاخد وكده كده هادفع!!!

قاموا قالوا إيه: لا يا ابني يا حبيبي ـ شوف الحنيه ـ إحنا هنلغي حكاية العساكر دي خالص ونحطلك إشارات ديجيتال فيها كاميرات هتصورك وانت بترتكب الجريمه..قصدي وانت بتعمل المخالفه..يعني هتتباس هتتباس يا عباس..قلت والله كويس ع الأقل الفلوس اللي هادفعها هاتصور بيها..وجايز أطلع في الفتزليون كمان..يا حلاوه يا ولاد!!!

يا جماعه زي ما انتوا عارفين أنا ماشي جنب الحيط (حتى اقروا بوست أنا من هنا في المدونه اللي جنبنا)..ومبحبش أعترض ع الحكومه ..و انا مبعترضش لا سمح الله على إني أدفع مخالفه أنا عملتها ..لكن إني أدفع مخالفه معملتهاش لمجرد إن عسكري معندوش ضمير أخد النمره فدي بأى حاجه تغيظ!!!

واللي يغيظ أكتر إني ممكن أتحبس علشان مش رابط حزام الأمان..يا عم إنت مالك..أربطه ماربطوش أنا حر..تحبسني ليه؟؟ يعني هو أنا لو عملت حادثه أنا اللي هاتعور والا الحكومه؟!!! واضح إن الحكومه مصره تثبتلنا إنها بتخاف علينا أكتر من نفسنا ...وكمان بتخاف على فلوسنا لنضيعها في كلام فاضي..فبتاخدها مننا في صورة مخالفات وضرايب ورسوم علشان تصرفها في حاجات مفيده..ورغم إني مش عارف إيه هي الحاجات المفيده دي..بس هي أكيد مفيده طالما الحكومه اللي بتعملها..طبعا..دول حكومه يابا وعرفين كل الكلام!!!


حاجه كمان تغيظ – مهو انت لازم تتغاظ – قال إيه خير اللهم اجعله خير لو انت حطيت دبدوب ع التابلوه أو علقت سبحه ع المرايه ممكن يسحبوا منك الرخصه ويدفعوك غرامه..شفتوا الحريه والديموقراطيه..تقوله يا عم انت مالك..أحط دبدوب أحط قرد أعلق سبحه أعلق ديل فار إنت مالك..عربيتي وأنا حر فيها..يقولك لأ يا خفيف الحاجات دي بتعوق الرؤيه وبتسبب حوادث!!!

شفتو الهنا اللي احنا فيه ...تخيل يا أخي الدبدوب بتاعك طلع هو سبب الحوادث..مش المطبات الكتيره ولا الشوارع المنيله بنيله ولا التخطيط الغلط ولا الرصف بتاع الطرق اللي زي قلته ولا تخطيط البلد اللي مش تخطيط أصلا...لأ هو الدبدوب بتاعك السبب..مش قلتلك هتتباس هتتباس يا عباس!!!

واحد قريبي عنده عربيه نص نقل..بيصرف منها ع البيت..كل ما يطلع مشوار يا عيني يلاقي حمله تسحب منه الرخص وتدفعه غرامه ..طب بالذمه مش حرام يبقى طالع مشوار بعشرين جنيه يدفع عليهم 100 جنيه غرامه ..عارفين بيقولي إيه؟ بيقول أنا هاروح المرور وأقولهم أنا هاشغل العربيه وانتو خدو الإيراد كله واعملولي مرتب شهري ..مش مهم كام المهم يكون ثابت ومضمون!!!

عشان كده أنا وهو وغيرنا كتير قررنا مننزلش وسط البلد بالعربيه..يا سيدي مالها المواصلات ع الأقل هابقى عارف بالظبط أنا هادفع كام..وهابقى ضامن إن رخصتي تفضل في جيبي معززه مكرمه..مهو مش معقول كل يوم يتعملي مخالفه..مره دبدوب..مره سبحه..مره العادم ريحته مش عاجبه معالي سيادة البيه الظابط..مره لون العربيه مش مريح عنين معالي سيادته..لا يا عم..أنا مش عاوز أعكر صفو معالي سيادة البيه الظابط..وعلى رأي المثل إبعد عن الشر وغنيله!!!

الغريب إنك لو قريت القانون هتحس إن معظمه كويس..المشكله مش في القانون..المشكله في اللي بيطبقوالقانون ومبيراعوش أي ظروف ..المفروض يطبقوا روح القانون في مصلحة البلد والناس..يعني أنا لو معلق سبحه صغيره مبتعوقش الرؤيه ولا حاجه برضه هيتعملي عليها محالفه..لو العربيه مخدوشه خدش صغير اللجنه الفنيه هتعملك مخالفه وتقولك روح افحص وشغلانه من غير داعي..لأ وحاجات أهيف من كده..طب والله واحد دفع مخالفه علشان كاتب (بسم الله الرحمن الرحيم) على إزاز الباب بتاعه..طب بالذمه ده مش حرام..مانا قلتلك من الأول مع القانون الجديد هتتباس هتتباس يا عباس!!!!

حسبنا الله ونعم الوكيل ..

لتحميل تفاصيل القانون الجديد كاملا على الرابط التالي(أي خدمه):
http://www.4shared.com/file/55862722/5b4f09db/___online.html?dirPwdVerified=407cb1e5

1 هاه..إيه رأيك؟:

السلام عليكم و رحمه الله و بركاته
اولا كل سنة و انت طيب و رمضان كريم

ثانياا
مبروك على شكل المدونه الجديد

ثالثا بقى نتكلم عن الموضوع
فعلا قانون المرور ده بقى عامل زي مايكون سبوبة يلموا بيها فلوس من جيب الشعب
تحس ان الحكومه شغاله الله ينور
ضرايب من ناحية و قانون من ناحيه تانيه و الناس معادتش لاقيه تاكل

بس الواحد و الله لما قرا الموضوع باسلوبك معرفش يمسك روحه من الدحك
فعلا هم يدحك و هم يبكي
و مصائب قوم عند قوم فوائد

بكرة يعملولنا قانون المدونات

تسلم ايدك
دم طيبا و كن بخير
 

إرسال تعليق