الثلاثاء، 16 ديسمبر 2008

تخــــــــــاريـــــــــــــــف

تخـــــاريف
(بالعاميه)
----------------------

أنا لامم هنا فـ بيتي حدود الكون

ومن خيبتي منيش فاكر..

"بيتي" فين مكانه يكون!!

ساعات يبقى هنا قريب

ساعات معرفش يبقى ازاي على الأوزون!!!

ساعات بلاقيه كما "الإليزيه"..

وفيه خدام هنا وهناك

والاقيني زي البيه

وأوامري في لحظه تكون!!!

وفجأه يبقى "بيت" بالطين!!

ولا فيه غيري بني آدمين

لو أأمر فيه بإيه ما يكون!!!

ساعات بلاقيني فيه ريس..

طيب..مهو كده كويس

وفجأه فـ لحظه بلاقيني..

بقيت مسجون!!

ساعات تملاه كده فرحه..

طيور سارحه..

ألوف زغاريد!!

وساعه يبقى متستف بكا وشجون!!

وياما فـ "بيتي" أنا حبيت..

صبايا مليحه تملى العين

ودي بيضا..ودي شقرا..ودي سمرا..

ودي مش عارف أنا والله ده إيه اللون!!

تقولي كان عددهم كام؟!!

هاقولك والله مانا فاكر

يجولهم كده بالويم ييجي تلتميت مليون

ساعتها بابقى مش عارف أنا اطلع مين!!

أنا عنتر؟!!

أنا روميو؟!!

أنا المجنون؟!!

وساعه بابقى مش لاقي ولا واحده..

ولا حتى كده صوره وليها عيون!!

وفي مرايه هنا في "البيت"

باشوف فيها واحد غيري!!

وفجأه باكون واحد غيره!!

وغــير الاتنين!!!

ومش عارف ده كله إزاي؟!!!

وييجي منين؟!!!

هل عقلي صبح مجنون؟!!!

والا "بيتي" ده مسكون؟؟؟

***






4 هاه..إيه رأيك؟:

لما تعرف مكان البيت بالظبط ياريت تقولى عنوانه ..


يجولهم كده بالويم ييجي تلتميت مليون


حلزه الفكره وتعبيرك عنها

تحياتى
 
ايه ياعم شادى الجمال ده كيييف كده تتحفنا

:D

منتظرين كل جديد
 
HAPPY

أسعدني مرورك

وطبعا لو عرفت مكان البيت أكيد هاقولك

هو حاليا قابع على أحد سطور كشكولي!!!!

شكرا لمرورك

تحياتي
 
heba sayed

أهلا بك

ويا ستي أنا مش كييييف ولا حاجه

إنت عاوزاهم يقبضوا عليا والا إيه؟!!!

نورتيني بجد
 

إرسال تعليق