الأحد، 28 ديسمبر 2008

شد اللحــــــاف



شــد اللحـــــــاف

عذرا غزه...لا أملك إلا قلمي وبعض الدعاء


شد اللحاف

ويا بخت من سلم وخاف

ويا بخت من شايف أخوه

راحوا وخدوه

وبيضربوه

وينادي من تحت اللحاف

"يا جماعه ميصحش كده"

"عيب كل ده"

"يلا عشان خاطري سيبوه"

ولا يسمعوه..

هيموتوه

ولسه أخوه تحت اللحاف

طلع دماغه حبتين

وعينه زاغت ع الشمال..

بعد اليمين

ركز أوي جدا وشاف..

جثة أخوه..

وبالعياط حبه اتخنق..

زربن أخينا واتحمق..

صار يجري وكأنه فـ سبق

فجأه وقف..

فكر كده حبه وقال:

"وخروجي من تحت اللحاف..

راح يعمل إيه؟!!!

يا بخت من سلم وخاف!!!"

***

طنش ونام معرفش كام

سمع زعيق..

بعده صريخ..

بعده شوية دربكه..

وحبة كلام..

مكانش عارف..

ده بصحيح والا منام!!

ركز شويه في الكلام

باينه ده صوت المدام

طلع دماغه م اللحاف

ركز أوي جدا وشاف..

اللي كانوا خوّفوه..

اللي يوم قتلوا أخوه..

رجعوا عشان ياخدوا المدام

طأطأ شوية طأطأه!!

ولألأ شوية لألأه!!

وقال : "خلاص هاخرج بأى"

رجع وكحكح كحتين

"دي الدنيا برد حبتين"

"وأصل أنا عندي زكام"

وخروجي يعني هيعمل ايه؟!!!

وإيه حيجرا للمدام؟!!!!

شد اللحاف!!

طنش ونام!!

***







17 هاه..إيه رأيك؟:

واحد من الناس

اولا الفكره وتعبيرك عنها ممتاز .. روعه بجد ..

ثانيا بقى اللا مبالاه اللى كلنا بقينا فيها وحتى لو مفيش لا مبالاه مش عارفين نعمل إيه عشان نكون قادرين نغير وبنكتفى بحبة زعيق وحبة كلام ..
الكلام مفيش منه فايده بس السكوت ممكن يخنقنا وبصراحه احنا محتاجين حاجه اقوى من الكلام ومن السكوت ..
 
HAPPY

أولا أهلا بيكي

ثانيا

إذا كان السكوت هيخنقنا ويموتنا بسرعه ونخلص فالكلام اللي لا بيودي ولا بيجيب هيموتنا بالبطيء

كده وكده مش نافع

كده وكده الناس بتموت كل يوم

بجد يا ريت نعمل حاجه بدل الموت..بالكلام أو السكوت
 
واحد من الناس

لو عرفت احا المفروض نعمل ايه اكيد لازم تعرفنى عشان هكون معاكوا ان شاء الله ..
 
تشبهات رائعة مع الاسف فهي حقيقة مرة

احسنت التعبير و الدباجة باسلوب تصويري بديع

تحياتي
 
HAPPY

أهلا بيكي كمان مره

طبعا لو عرفت أنا مش هاقولك بس أنا هاقول لمصر كلها

زي متقولي كده أنا كنت بفكر بصوت عالي

مش أكتر
 
أحــوال الهـوي

أهلا بك بمدونتي

شرفني مرورك جدا

أسعدني كثيرا

أتمنى أن يتكرر

تحياتي
 
عندك حق
احنا بقينا قمة اللا مبالاة

اسلوب اكتر من رائع كالعادة
تسلم الايادي

لو تسمحلي بعد اذنك يا د/ شادي
ممكن اخدها احطها ف مجلة الأسرة .. فيه ركن هنعمله للمدونين .. لو مفيش مانع عند حضرتك يعني
 
FreeKiller

أهلا بك

وشكرا لمرورك وردك

وطبعا

مفيش أي مانع إنها تتحط في مجلت الأسره

وهيكون ليا الشرف

دمت بكل خير
 
الشرف لينا احنا
متشكرين جدا
ربنا يوفقك دايما يا رب
 
كلمات القصيدة بجد

جاامدة جدا وموحية وبتعبر عم واقع بيحصل فعلا

اتمنى ميكونش هو القاعدة

تحياتى ليك
 
دعاء مواجهات

أهلا بك بمدونتي

أسعدتني زيارتك

وأتمنى مثلاك غنه ميكونش قاعده

تحيتي لك
 
تسلم على الإبداع ده يا باشا
 
خادم الدعوه

شرفتني بالمرو وبالرد
 
الله عليك يا شادي


انت كمااااااااااان
بتكتب شعر عامي


حبيبي

لينا لقاء
أنا بكتب برضو شعر عامي

عجبتني أوي الحتة دي
وبالعياط حبه اتخنق..

زربن أخينا واتحمق..

صار يجري وكأنه فـ سبق

الله يابني

رائعة


تحياتي
وبجد
سلم قلمك
 
الجوهري عندنا

يا مرحبا يا مرحبا

أنا عارف طبعا إنك بتكتب عامي كويس

يعني بقيت أبو الزمل

بس أنا أقدم منك ياد

شرفتني يا باشا
 
و قولت عادى
جيوش غريبه
تهجم تخرب
قال ايه تحرر
بلاد قريبه
بالزمه عيبه
و قلت مالى
ما هى مش بلادى
و عدانا ترعى
فى ارض حره
و تبقى مرعى
لكل فاضى
نصاب و عامل
فيها قاضى
و برضه قلنا
و ماله عادى
و قلنا مالنا
ما هيش بلادى
مش راح نفوق
و ندرى الا
ما ييجى دورنا
و لا حنبقى
غنم و نوق
ايه يا ابن بلدى
مش راح تفوق

ده جزء من عمل متواضع قديم فكرتنى بيه رائعتك اللى بلاشك اروع بمراحل
-------------------

مش بس ساخر من الاوضاع الاجتماعيه
كمان السياسيه
كل مره بكتشف بعد جديد
و موهبه جميله و قلم له خلفيته و هويته

جميل بجد
 
ســـــــهــــــــــر

بالطبع زيارتك تشرفني وتسعدني

وأعجبتني جدا مقطوعتك ليتك كتبت القصيدة كلها

شكرا لمرورك

دمت بكل خير
 

إرسال تعليق