الاثنين، 19 يناير 2009

تاااااااااج..الله يسامحك يا جوهري

بسم الله نبدأ

ده تاج مرره ليا الزميل المدون المحترم /محمد الجوهري(حفظه الله ورعاه)

ورغم إنه تاج رزل حبتين وتدبيسه لكن هنجاوب أمرنا لله


السؤال الأول:إذكر ستة أسرار يكتشفها من يقابلك لأول مره؟؟


طب ولما هي أسرار ، اللي بيقابلني أول مره هيكتشفها إزاي؟!!

عموما الناس اللي عرفتني في الفتره الأخيره ، قالوا إنهم من أول مره حسوا إني:

طيب

مبعرفش أكدب (خيبه يعني وبتفقس على طول)

خجول زياده عن اللازم

ساعات بقول كلام مش المفروض أقوله (تقريبا قصدهم إني ساعات بابقى مدب)...رغم إني شايف إني صريح مش مدب بس هما أصدق طبعا لأن الواحد ميعرفش يحكم على نفسه

مش سهل أقيم علاقه مع حد وغالبا باستنى الحد ده لما يبدأ هو العلاقه (شوية غباء اجتماعي كده على ما قسم)

تسريحة شعري قديمه شويه!!!!ولبسي كلاسيك شويه!!!



السؤال الثاني:سبع حاجات نفسك تعملهم؟؟

.ألتزم دينيا شويه..حاسس إني مقصر

.نفسي أبني جامع

.ألتزم في دراستي أكتر من كده وأطلع دكتور شاطر ينفع الناس بجد

.أتزوج واحده بنت حلال وتكون زوجه صالحه بمعنى الكلمه

. أشتري عربيه بي إم دبليو الفئه الخامسه!!!

. أخش أي سباق سيارات حاسس إن دي الحاجه الوحيده اللي أنا فالح فيها

.نفسي آخد دورة تنميه بشريه في مهارات الإتصال يمكن أعرف أعامل الناس أحسن من كده وأكون صداقات جديده بسهوله




السؤال الثالث: سبع حاجات معرفتش تعملهم؟؟

أكيد طبعا السبع حاجات اللي فوق اللي باتمنى أعملهم وكمان :

- عمري ما عرفت أواظب على القراءه..بازهق بسرعه

- ماعرفتش أطول كمان خمسه سم

- مش عارف أخس خمسه كيلو بس

- مش عارف أواظب على لعب أي رياضه (بقالي خمس سنين بحاول وكل مره بابطل)

-لحد دلوقتي حاسس إني ماعرفتش أكون على قدر احترام الناس ليا..بمعنى إني ماعرفتش أكون الشخص اللي عيلتي بتتمناه لكن الحمد لله حاسس إني باتغير للأحسن وجايز في يوم أوصل للمستوى اللي أنا عاوزه..

السؤال الرابع:سبع حاجات دايما بتقولهم؟؟

- باختم جمل كتير بكلمة "..وكده"

- "هيسخطوك يا قرد هيعملوك إيه" باقولها لأي حد خايف من أي حاجه بحس إن معناها إن أي حاجه هتحصل أكيد فيه أوحش منها يعني مش هتبقى أوحش حاجه في الدنيا

- كتير بالاقيني باقول أجزاء من قصيدة "في القدس" بتاعة تميم البرغوثي..بحبها مووت

- ساعات بادعي دعاء كده عامله رنه للموبايل بتاع الشيخ ماهر المعيقلي بيقول"يا إلهنا ويا مولانا ويا سيدنا ، عز جارك وجل ثناؤك وتقدست أسماؤك ، ولا إله غيرك ، يا مجيب الدعوات ، يا قاضي الحاجات ، اللهم يا مقلب القلوب ثبت قلوبنا على دينك ، برحمتك يا جواد يا كريم"

-أي حد اسمه أحمد أو محمد أو محمود لا إرادي كده باقوله "يا ابو حميد"

..كفايه كده مش فاكر حاجه تاني..

السؤال الخامس : سبع مشكلات في حياتك ممكن تحلهم بالفلوس؟؟

بيتهيألي حياتي - والحمد لله - هادئه مستقره ومفيهاش مشاكل كتير وحتى المشاكل اللي فيها - للأسف - متتحلش بالفلوس بس ممكن:

- مشكلة الجواز طبعا محتاج تكاليف كتير

-ومشكلة شرا العربيه البي إم دبليو اللي قلتلكم عليها فوق

-طبعا تجهيز العياده زي ما أنا عاوز

السؤال السادس: سبع أماكن بتحبها؟؟

- البيت :ده أكتر مكان بحبه بجد وقصدي بالبيت أي مكان يكون فيه ماما واخواتي مش مهم فين

- البلد(قريه كده مش ع الخريطه) : بحس براحه غريبه وأنا هناك

- العربيه : ممكن أبات فيها عادي يعني وممكن أسوقها 24 ساعه في اليوم من غير ما أتعب ومش مهم أروح فين والا آجي منين

- أي حته أخرج فيها مع اصحابي اللي بحبهم جدا ومش مهم فين

السؤال السابع: أشخاص بتحبهم غير بابا وماما واخواتي؟؟

- أصحابي: محمد عبد الكريم (صاحب مدونة مطرح ما ترسي دقلها) ومدحت وسامح وخالد وأحمد

- زمايل الظروف مسمحتش إني أقرب منهم رغم إن نفسي أصاحبهم زي محمد الباز ( صاحب مدونة خبيب) ومحمد حسام (صاحب مدونة عيش ندل تموت محروق) وكل اللي اسمهم بيبدأ بحرف الشين في سنه ساته طب..أي شادي وأي شريف..كلهم يتحبوا..

-عيلتي : وأخص بالذكر أعمامي وخالاتي وعاطف ابن خالتي ( أجدع وأكرم واحد شفته في حياتي)

-الأستاذ حسن(مدرس اللغه العربيه) : أشعر بمزيح من الحب والاحترام لهذا الرجل..أدين له بكل ما أعرفه عن اللغه العربيه وبحبي لها وللشعر

السؤال الثامن:مدونين بتحب تقرالهم؟؟

كتير..طبعا اللي في قائمة المدونات في جانب الصفحه وبالذات:

مطرح ما ترسي دقلها : بتعجبني كتاباته جدا ، فيها حاجه كده بتجبرني أقراها ، واستمتع بيها

خبيب: أديب بمعنى الكلمه ، مثقف ، عقليه محترمه جدا ، وأهم حاجه إنه شاعر عملاق وبجد وحشني شعره جدا

أجدع بنوته: طبعا كتابات ولا أروع ، وغنيه عن أي تعريف وأي كلام

فري كيلر : الفصحى الرائعه اللي متعرفش تمسك وراها ولا غلطه

أدهم : بحس إنه عاقل ، واعي ، مثقف ومتزن جدا

على بالي: إحساسها ملوش حل

دكتور بهدوء: شخصيه محترمه جدا وكتاباته جامده جدا

السؤال التاسع: تمرر الواجب لمين؟؟

والله مش عاوز حد يدعي عليا اللي عاوز ياخد الواجب يتفضل بس نفسي أمرره إلى:

خبيب ، مطرح ما ترسي دقلها ، أدهم ، دكتور بهدوء



أخيرا ، باشكر الجوهري على التاج رغم العذاب اللي وراهولي ، بقالي ساعه وربع برد..

دمتم بكل خير

16 هاه..إيه رأيك؟:

السلام عليكم
متشكر جدا يا شادي عالمجاملات دي
ههههههههههه (وش يدعي البرود)
وبعدين وش بيطلع لسانه

يا عم أول سؤااااااال
لا يكتشفهاااااا من يقابلك لأول مرة

سووووو غير الإجابة يا باشا لأن الموضوع بتاعها اتغير طبعااااا




ايه يا عم
دا كلمتين ف السريع
ساعة وربع مين بس
انت بطيء ف الكتابة؟؟؟؟؟؟؟
ههههههههههههههههههه

عموما
كل سلطانية وانت طيب

تحياتي شادي بك
 
وعليكم السلام يا عم جوهري

(وش متغاظ من الوش اللي بيدعي البرود)

تصدق مأخدتش بالي من السؤال ..مش عارف إزاي

عموما خليه كده وخلاص..لأهو تغيير..وبعدين يعني كفايه اللي كتبته هو أنا مش ورايا غيرك والا إيه

وشكرا على المرور والتصحيح

تحياتي
 
واحد من الناس
لسه عارفه دلوقتى ان اسمك شادى...

عمري ما عرفت أواظب على القراءه..بازهق بسرعه
اذاى؟؟؟؟ رغم انك بتكتب حلو اوى وانا اعرف ان اللى بيكتب بيحب يقرى برضه..

أشتري عربيه بي إم دبليو الفئه الخامسه!
احلامك متواضعه اوى..

إحساسها ملوش حل
فرحتنى الكلمه دى جدا..
 
HAPPY

أهلا بك

نورتيني

لسه عارفه دلوقتى ان اسمك شادى...
طب ده حلو والا وحش(على فكره نادرا لما بقابل حد ويعجبه اسمي)

اذاى؟؟؟؟ رغم انك بتكتب حلو اوى وانا اعرف ان اللى بيكتب بيحب يقرى برضه..

المفروض..لكن المفروض ده مش عارف أعمله لحد دلوقتي

احلامك متواضعه اوى..
طبعا..لازم أتواضع..علشان أعرف أوصل للي بحلم بيه لازم اللي بحلم بيه يكون واقعي!!!

فرحتنى الكلمه دى جدا..
وفرحني جدا إنها فرحتك


شكرا لمرورك
 
اسم شادى اسم حلو طبعا سيبك انت من الناس اللى مبيعجبهومش حاجه دول..
 
اجابات لذيذة و منطقية جدا

ربنا يوفقك ان شاء الله و يحققلك كل احلامك

تحياتى :)
 
dr_samarmar

لكم أسعدني مرورك

شكرا لك

تحياتي
 
اخسسسسس
كده تنسانى يا شادى من مدوناتك

على العموم البوست رائع :D
 
هبه

أولا نورتيني

ثانيا

إخص بالصاد مش بالسين

إتعلموا انجليزي بقى

ثالثا

أنا قلت كل المدونات اللي في السايد بار ومدونات حضرتك موجوده ومنوره السايد بار من أول ما اتعمل

يعني أنا منستكيش ولا حاجه

شكرا لمرورك
 
اجابات جميله ومدونه اجمل
تقبل مرورى وزيارتى لها
والسلام ختام
 
هههههههههههه نتعلم انجليزى بقى

مالو اخص بالصاد هيبقى نطقها تقيل اوى

بالسين اسهل يا شادى:D

برضو بوست رائع
 
اجاباتك جميلة وواقعية

تحياتى


احمد الشاعر
 
مبروووك التاج

اجاباتك حلوه :)
 
promise is promise

شرفتني بالمرور

شكرا على زيارتك

**************************

Heba Sayed

ماشي

نمشيها بالسين علشان خاطرك بس

لكن إعملي حسابك المره الجايه

كلمتي لا ممكن تنزل الأرض أبدا

***************************
elsha3er

أسعدني مرورك جدا

شكرا لك

**************************
اقصوصه

الله يبارك فيكي

مرورك طبعا هو الأحلى
 
اول مره اجى هنا الاقيك ف تاج
و التاج على اد ما هو واجب صعب
على اد ما هو صوره و انعكاس لشخصيتك او جوانب منها
يبقى اكيد حظى حلو انى اتعرف على الشخصيه مره واحده مش من متابعة كتاباته ف وقت كتير

تحياتى و امنياتى بتحقيق كل الاحلام
 
ســـــــهــــــــــر

سعيد بمرورك الأول

أتمنى دوام التواصل

شكرا لك

تحياتي
 

إرسال تعليق