السبت، 1 أكتوبر 2011

الباب موارب بالأمل


بحبك

بحبك والغرام باين

فـ عيني قبل ما اتكلم

ورغم ان الهوى ظالم

وكله جروح

فانا راضي اني اعيش مجروح

وراضي إني أتألم

بحبك

مش قرار مني

ولا صدفه

ولا شفتك فحبيتك

و لا خيرك مغرقني

وصنتيني فوديتك

ولا كنت أنا جاهل

وقمت لحبك اتعلم

ولا في الحب أنا معلم

انا أصلا منيش عارف

ولا فاكر

بقيتي انتي حبيبتي ازاي

باينه أمر متحتم

أعيش بيكي

وحبك نبض جوايا

معشش في خلايايا

حروفه بين حروف إسمي

تجاعيده على جبيني

مغزول مع الجينات

منظوم ما بين الدم

عايش ف ضي العين

وبين خيوط الحلم

*****

بحبك

عمري أو يمكن

قبل أنا ما اتولد حتى

وحالك والله حيرني

وشتتني لميت حته

ما بين شمسك وبين ضلك

وبين واحد صحيح حبك

وواحد أصبحت غايته

يدنس فيكي ويضلك

وما بين عمرك اللي راح

وكله جراح

وبين فرحك ويوم عزك

وصبحك جاي وفاضلك

وبين عتمه بخاف منها

ونور باين في مد الشوف

ينادي واسمعه عالي

خلاص يا ولادي مبقاش خوف

مبقاش فيكي أي خسيس

يبيعك بخسه ويذلك

*****

قالوا البيبان اتقفلت

وصبحتي مخنوقه

م الحبس والعتمه

يا خلق هوه

هل فيه بيبان؟؟

هتحرم الشمس الشروق

أو تحرم البدر انه يفضل عالي فوق

والباب موارب بالأمل

الباب موارب بالمحبه والاشتياق

قالوا...وكدبوا...

إن اللقا...

بيطفي نار المشتاقين

دول طلعوا أكبر كدابين

إيه يعمل الشوق ف اللقا

والا اللقا في الشوق

سكران بحبك أنا

مش ناوي إني أفوق

سكران بحبك

بس فايق للي جاي

علشان أخلي

فجر بكره ملوهش زي

وحياتنا تضحكلنا

وتتعدل وتروق

*****

كلنا بنقول "بحبك"

كل يوم بنقول "بحبك"

خلصنا في الحب الحروف

ضيعنا فيه كل اللي فات

هو الهوى يا اخوانا أصبح بالكلام ؟؟؟

هو اللي يهوى

يسرق النور من حبيبه؟؟

ميكونش ستره ويبقى عيبه؟؟

طب اللي فات

كان عمر ميت بالسكات

أو بالكلام اللي ما ينفع أو يضر

يبقى اللي جاي

مش عمر تاني يضيع هدر

مش صوت حبيس

قوم لما يعلى

يروح يهد الأهرمات

يقلب حياتنا كلها

وينادي فينا بالشتات

يبقى اللي جاي

لازم يكون صوت الضمير

والعقل يرسم كل خير

والخطوه ترفع أرضنا

فوق السما

زي الطيور

والإيد بتبني مش تهد

وتشيل بلدنا من هنا

للعالم الأول صحيح

العالم اللي ملوهش زي

وملوهش قد

وتحقق الحلم اللي كان

آسر عقولنا من زمان

وملوهش حد




20 هاه..إيه رأيك؟:

انت موهوب (:
الكلمات روعه والاحساس واصل بجد
ورغم ان في خلل في الوزن في كذا موضع لكن مقطعش عليا الاستمتاع بالقراءة
هكمل تصفح مدونتك
بالتوفيق
وبانتظار جديدك اكيد (:
 
وتحقق الحلم اللي كان

آسر عقولنا من زمان

وملوهش حد
________________
فعلا كان حلم
وأجمل حلم
أن تكون مصر دون طاغية
لقد فرحنا كأننا تخلصنا من طاغيتنا
شعرنا بسعادة بالغة
أسعدنا ماأسعد أخواننا في مصر
ونسأل الله أن يتحقق حلمنا بسقوط طاغية اليمن
لك أطيب تحية وتقدير
 
مش عارفه اخد مقطع بعينه اعلق عليه

كل مقطع ليه معنى وله وزن وفيه حاجه بتوصل للى بيقراه

ألف رائعه ويزيد

متابعه ان شاء الله
 
قُلم جُميل
ينبضِ ولا يتوقف نبضُه

ربي لآ يحرمنآ من سيل قلمكْ وحرفك
دمت بخير
 
ميرام

أهلا بك

فعلا هناك خلل في الوزن في بعض السطور

سيتم تدارك المشكله قريبا بإذن الله

شكرا لك :)
 
أحلام

إن شاء الله يتحقق حلمكم

وإن كنت أرى أنه تحقق وأنه سقط بالفعل

الله معكم

نورتي المدونه :)
 
مها البنا

أهلا بيكي

أسعدني مرورك حقا

وراقني تعليقك

شكرا لك :)
 
عازفة الألحان

أهلا بك

ولا حرمنا من مرورك أيضا

شكرا لمرورك :)
 
بجد مش عارفة أقول لحضرتك إيه؟؟
أنا بقالي 3 أيام بحاول أحط التعليق بس مش عارفة ليه مش راضي ينزل...

بجد من أروع ماقرأت..يعني مش عارفة حاسة انك غلبت هشام الجخ..
أنا محسيتش بخلل الوزن يمكن من كتر المعنى مغطي على كل حاجة أو...مش عارفة

معناها جاي ع الجرح بالضبط..رااااااااائعة بجد وجت في وقتها...
نفسي أعلقها ف كل شارع وعلى كل حيطة أناولها لكل مصري..بجد يعني الكلام ميوصفش مدى تأثيرها فيا...

جزاك الله خيرا وربنا يوفقك..صحيح انت طولت الغيبة..بس جيت ومعاك حاجة تكفيك غيبة سنين براحتك بقى..ههههـ.. ربنا يوفقك وفي انتظار جديدك
 
قــــــــــــلم
انت عالمى والله العظيم

لخصت كلام كتير جوا كتير اوى من اللى بيحبوا البلد دى

يارب تكونى بخير دايما يا بلادى

تحياتى لقلمك الجميل
 
جميلة جدا .. كلمات واحساس راقي .

استمتعت بالمرور والقراءة.

دمت بخير اخي الكريم.
 
قلم

مش عارف أقول إيه

بجد دايما تعليقاتك مشجعه جدا جدا

مش لاقي غير

شكرا

وجزاك الله كل خير

دمت بخير :)
 
iـــــــــــsــــــــــlــــــــــــaـــــــــm


أهلا بيك

ولا ياعم أنا مش عالمي ولا حاجه

i am made in Egypt :)

ههههه

بجد شكرا ليك على تعليقك الرقيق

تحياتي :)
 
وجع البنفسج

نورتيني

وشكرا لك على مرورك

تحياتي :)
 
جميله ...


للعلم حلو اسم واحد من الناس اختيار جيد

شكرا لمرورك

تحياتى
 
الله
بجد حلوة كتير
بس انا في شيء شتتني اوووي
مش خاص بالقصيدة
خاص بالمدونة نفسها
هو برضة مش المدونة كان اسمها غير ...؟
اقصد اسم تاني مش سلو قلمي...؟
والا انا اللي بخلط بين مدونتين ...؟
 
بنوته مصريه

أهلا بيكي

منوره المدونه

هو إسم واحد من الناس حلو..شكرا

بس مش جديد ولا حاجه ، أنا بدون بالإسم ده من 2007 ومي قبلها على بعض المنتديات

أسعدني مرورك

شكرا لك :)
 
re7ab.sale7

أهلا بيكي

منوره

بالنسبه للمدونه هي طول عمرها اسمها كده

بس أنا كان ليا مدونه تانيه بإسم تاني بس قفلتها

جايز تكون هي دي اللي شتتك

نورتيني كمان مره

شكرا لمرورك
 
يارب الحلم يكمل للاخر على خير
كلماتك جميله ومعبره
تسلم ايدك
 
Bent Men ElZman Da

أهلا بك

إن شاء الله الحلم هيكمل

وبإذن الله وبتوفيق ربنا وبأيدينا

ربنا هيصلح الحال وهتبقى أحسن بلد في الدنيا

أسعدني مرورك

شكرا لك
 

إرسال تعليق