تاااااااااج..الله يسامحك يا جوهري

بسم الله نبدأ

ده تاج مرره ليا الزميل المدون المحترم /محمد الجوهري(حفظه الله ورعاه)

ورغم إنه تاج رزل حبتين وتدبيسه لكن هنجاوب أمرنا لله


السؤال الأول:إذكر ستة أسرار يكتشفها من يقابلك لأول مره؟؟

طب ولما هي أسرار ، اللي بيقابلني أول مره هيكتشفها إزاي؟!!

عموما الناس اللي عرفتني في الفتره الأخيره ، قالوا إنهم من أول مره حسوا إني:

طيب

مبعرفش أكدب (خيبه يعني وبتفقس على طول)

خجول زياده عن اللازم

ساعات بقول كلام مش المفروض أقوله (تقريبا قصدهم إني ساعات بابقى مدب)...رغم إني شايف إني صريح مش مدب بس هما أصدق طبعا لأن الواحد ميعرفش يحكم على نفسه

مش سهل أقيم علاقه مع حد وغالبا باستنى الحد ده لما يبدأ هو العلاقه (شوية غباء اجتماعي كده على ما قسم)

تسريحة شعري قديمه شويه!!!!ولبسي كلاسيك شويه!!!



السؤال الثاني:سبع حاجات نفسك تعملهم؟؟

.ألتزم دينيا شويه..حاسس إني مقصر

.نفسي أبني جامع

.ألتزم في دراستي أكتر من كده وأطلع دكتور شاطر ينفع الناس بجد

.أتزوج واحده بنت حلال وتكون زوجه صالحه بمعنى الكلمه

. أشتري عربيه بي إم دبليو الفئه الخامسه!!!

. أخش أي سباق سيارات حاسس إن دي الحاجه الوحيده اللي أنا فالح فيها

.نفسي آخد دورة تنميه بشريه في مهارات الإتصال يمكن أعرف أعامل الناس أحسن من كده وأكون صداقات جديده بسهوله




السؤال الثالث: سبع حاجات معرفتش تعملهم؟؟

أكيد طبعا السبع حاجات اللي فوق اللي باتمنى أعملهم وكمان :

- عمري ما عرفت أواظب على القراءه..بازهق بسرعه

- ماعرفتش أطول كمان خمسه سم

- مش عارف أخس خمسه كيلو بس

- مش عارف أواظب على لعب أي رياضه (بقالي خمس سنين بحاول وكل مره بابطل)

-لحد دلوقتي حاسس إني ماعرفتش أكون على قدر احترام الناس ليا..بمعنى إني ماعرفتش أكون الشخص اللي عيلتي بتتمناه لكن الحمد لله حاسس إني باتغير للأحسن وجايز في يوم أوصل للمستوى اللي أنا عاوزه..

السؤال الرابع:سبع حاجات دايما بتقولهم؟؟

- باختم جمل كتير بكلمة "..وكده"

- "هيسخطوك يا قرد هيعملوك إيه" باقولها لأي حد خايف من أي حاجه بحس إن معناها إن أي حاجه هتحصل أكيد فيه أوحش منها يعني مش هتبقى أوحش حاجه في الدنيا

- كتير بالاقيني باقول أجزاء من قصيدة "في القدس" بتاعة تميم البرغوثي..بحبها مووت

- ساعات بادعي دعاء كده عامله رنه للموبايل بتاع الشيخ ماهر المعيقلي بيقول"يا إلهنا ويا مولانا ويا سيدنا ، عز جارك وجل ثناؤك وتقدست أسماؤك ، ولا إله غيرك ، يا مجيب الدعوات ، يا قاضي الحاجات ، اللهم يا مقلب القلوب ثبت قلوبنا على دينك ، برحمتك يا جواد يا كريم"

-أي حد اسمه أحمد أو محمد أو محمود لا إرادي كده باقوله "يا ابو حميد"

..كفايه كده مش فاكر حاجه تاني..

السؤال الخامس : سبع مشكلات في حياتك ممكن تحلهم بالفلوس؟؟

بيتهيألي حياتي - والحمد لله - هادئه مستقره ومفيهاش مشاكل كتير وحتى المشاكل اللي فيها - للأسف - متتحلش بالفلوس بس ممكن:

- مشكلة الجواز طبعا محتاج تكاليف كتير

-ومشكلة شرا العربيه البي إم دبليو اللي قلتلكم عليها فوق

-طبعا تجهيز العياده زي ما أنا عاوز

السؤال السادس: سبع أماكن بتحبها؟؟

- البيت :ده أكتر مكان بحبه بجد وقصدي بالبيت أي مكان يكون فيه ماما واخواتي مش مهم فين

- البلد(قريه كده مش ع الخريطه) : بحس براحه غريبه وأنا هناك

- العربيه : ممكن أبات فيها عادي يعني وممكن أسوقها 24 ساعه في اليوم من غير ما أتعب ومش مهم أروح فين والا آجي منين

- أي حته أخرج فيها مع اصحابي اللي بحبهم جدا ومش مهم فين

السؤال السابع: أشخاص بتحبهم غير بابا وماما واخواتي؟؟

- أصحابي: محمد عبد الكريم (صاحب مدونة مطرح ما ترسي دقلها) ومدحت وسامح وخالد وأحمد

- زمايل الظروف مسمحتش إني أقرب منهم رغم إن نفسي أصاحبهم زي محمد الباز ( صاحب مدونة خبيب) ومحمد حسام (صاحب مدونة عيش ندل تموت محروق) وكل اللي اسمهم بيبدأ بحرف الشين في سنه ساته طب..أي شادي وأي شريف..كلهم يتحبوا..

-عيلتي : وأخص بالذكر أعمامي وخالاتي وعاطف ابن خالتي ( أجدع وأكرم واحد شفته في حياتي)

-الأستاذ حسن(مدرس اللغه العربيه) : أشعر بمزيح من الحب والاحترام لهذا الرجل..أدين له بكل ما أعرفه عن اللغه العربيه وبحبي لها وللشعر

السؤال الثامن:مدونين بتحب تقرالهم؟؟

كتير..طبعا اللي في قائمة المدونات في جانب الصفحه وبالذات:

مطرح ما ترسي دقلها : بتعجبني كتاباته جدا ، فيها حاجه كده بتجبرني أقراها ، واستمتع بيها

خبيب: أديب بمعنى الكلمه ، مثقف ، عقليه محترمه جدا ، وأهم حاجه إنه شاعر عملاق وبجد وحشني شعره جدا

أجدع بنوته: طبعا كتابات ولا أروع ، وغنيه عن أي تعريف وأي كلام

فري كيلر : الفصحى الرائعه اللي متعرفش تمسك وراها ولا غلطه

أدهم : بحس إنه عاقل ، واعي ، مثقف ومتزن جدا

على بالي: إحساسها ملوش حل

دكتور بهدوء: شخصيه محترمه جدا وكتاباته جامده جدا

السؤال التاسع: تمرر الواجب لمين؟؟

والله مش عاوز حد يدعي عليا اللي عاوز ياخد الواجب يتفضل بس نفسي أمرره إلى:

خبيب ، مطرح ما ترسي دقلها ، أدهم ، دكتور بهدوء



أخيرا ، باشكر الجوهري على التاج رغم العذاب اللي وراهولي ، بقالي ساعه وربع برد..

دمتم بكل خير

المــعــــضـلـه!!!

ما تخيلت يوما أنّ شيئا يحدث لي ويدفعني لأن أكتب ما أكتب الآن ، ولم أتصور - طالما أن ذلك الشيء حدث - أني ستواتيني الجرأة لأكتبه وأنشره هكذا على الملأ..

تقول الغالية أمي : " أمر عظيم أن تستطيع - كلما أصابك هم - أن تمسك قلما ، وتخط ما يحزنك ، وتروي للورق همومك ، وتبثه كربك" ، ربما أنا أفعل ذلك الآن ، أو ربما أنني وددت الاعتراف - أخيرا - أن لدي مشكلة ما ، بل يبدو أنني وددت أن أواجه تلك المشكله..

ربما لا أعرف تلك المشكلة تحديدا ، أو ربما أعرفها بمنتهى الدقة وغاية الوضوح ولا أود قول ذلك ، لأنني إن قلت ذلك كان لزاما عليّ أن أجد حلا جذريا - وربما أعرفه - وكان لزاما عليّ أيضا أن أطبق هذا الحل ، وهذا ما لم أستطعه إلى الآن ..

قد يعتقد البعض أنه إذا كانت لديك مشكله ما ، وكنت تعرف جيدا طريقة لحلها ، وكنت تملك كل ما يلزمك لتطبق هذا الحل وتنجح به ، فقد انتهت المشكله ، ولا أرى الأمر بهذه البساطه ، فبيت القصيد أن تملك القدرة لتجمع كل ما تملك لتصنع منه نجاحا ، وإن القدرة لذلك تكمن في ذلك المزيج الفريد من الثقة بالنفس ، والإرادة القوية ، والعزيمة التي تدفعك دفعا لتعمل وتعمل وتعمل ، والإصرار على المواصلة أيا كانت الصعاب ، والصبر على ما تفعل حتى ينجح ، والأمل بأنه يوما ما سينجح ، ثم أضف إلى كل ذلك - أو لا تضف - الإمكانات الازمه والظروف الملائمه..

والأهم من كل ذلك هو ذلك الرابط الذي يربط كل العناصر معا ، ويصوغها في تناغم عجيب لتصبح نجاحا باهرا..إنه الإيمان...الإيمان بالله..ثم بنفسك وقدرتك..

إنها إذا معادلة صعبة جدا ، أو ربما - من وجهة نظر المتكاسلين أمثالي - إنها معضله !!!

شد اللحــــــاف

شــد اللحـــــــاف

عذرا غزه...لا أملك إلا قلمي وبعض الدعاء

شد اللحاف

ويا بخت من سلم وخاف

ويا بخت من شايف أخوه

راحوا وخدوه

وبيضربوه

وينادي من تحت اللحاف

"يا جماعه ميصحش كده"

"عيب كل ده"

"يلا عشان خاطري سيبوه"

ولا يسمعوه..

هيموتوه

ولسه أخوه تحت اللحاف

طلع دماغه حبتين

وعينه زاغت ع الشمال..

بعد اليمين

ركز أوي جدا وشاف..

جثة أخوه..

وبالعياط حبه اتخنق..

زربن أخينا واتحمق..

صار يجري وكأنه فـ سبق

فجأه وقف..

فكر كده حبه وقال:

"وخروجي من تحت اللحاف..

راح يعمل إيه؟!!!

يا بخت من سلم وخاف!!!"

***

طنش ونام معرفش كام

سمع زعيق..

بعده صريخ..

بعده شوية دربكه..

وحبة كلام..

مكانش عارف..

ده بصحيح والا منام!!

ركز شويه في الكلام

باينه ده صوت المدام

طلع دماغه م اللحاف

ركز أوي جدا وشاف..

اللي كانوا خوّفوه..

اللي يوم قتلوا أخوه..

رجعوا عشان ياخدوا المدام

طأطأ شوية طأطأه!!

ولألأ شوية لألأه!!

وقال : "خلاص هاخرج بأى"

رجع وكحكح كحتين

"دي الدنيا برد حبتين"

"وأصل أنا عندي زكام"

وخروجي يعني هيعمل ايه؟!!!

وإيه حيجرا للمدام؟!!!!

شد اللحاف!!

طنش ونام!!

***

تخــــــــــاريـــــــــــــــف

تخـــــاريف

(بالعاميه)
----------------------

أنا لامم هنا فـ بيتي حدود الكون

ومن خيبتي منيش فاكر..

"بيتي" فين مكانه يكون!!

ساعات يبقى هنا قريب

ساعات معرفش يبقى ازاي على الأوزون!!!

ساعات بلاقيه كما "الإليزيه"..

وفيه خدام هنا وهناك

والاقيني زي البيه

وأوامري في لحظه تكون!!!

وفجأه يبقى "بيت" بالطين!!

ولا فيه غيري بني آدمين

لو أأمر فيه بإيه ما يكون!!!

ساعات بلاقيني فيه ريس..

طيب..مهو كده كويس

وفجأه فـ لحظه بلاقيني..

بقيت مسجون!!

ساعات تملاه كده فرحه..

طيور سارحه..

ألوف زغاريد!!

وساعه يبقى متستف بكا وشجون!!

وياما فـ "بيتي" أنا حبيت..

صبايا مليحه تملى العين

ودي بيضا..ودي شقرا..ودي سمرا..

ودي مش عارف أنا والله ده إيه اللون!!

تقولي كان عددهم كام؟!!

هاقولك والله مانا فاكر

يجولهم كده بالويم ييجي تلتميت مليون

ساعتها بابقى مش عارف أنا اطلع مين!!

أنا عنتر؟!!

أنا روميو؟!!

أنا المجنون؟!!

وساعه بابقى مش لاقي ولا واحده..

ولا حتى كده صوره وليها عيون!!

وفي مرايه هنا في "البيت"

باشوف فيها واحد غيري!!

وفجأه باكون واحد غيره!!

وغــير الاتنين!!!

ومش عارف ده كله إزاي؟!!!

وييجي منين؟!!!

هل عقلي صبح مجنون؟!!!

والا "بيتي" ده مسكون؟؟؟

***

إذًا فــارحـــل...

تقاسَمْ أنتَ والأيامُ دمعاتِي

ولا تندمْ..

فما دمعي بمغرقِني

وما حزني..

بباق ٍ بين طياتي

ولن يبقى الأسَى لحنًا..

على أوتار آهاتي

غدًا تصفو ليَ الدنيا

وأصبحُ مثلَ نور الشمس ِ

إنْ يخبو..

يعودُ ويملؤ الدّنيا

ويسبحُ في الفضاءاتِ

إذًا فارحلْ..

فإن ترحلْ..

سيخبو صوتُك الرّنانُ من أذني

سأنسى صورة نُقِشَت..

كحفر الصخر..

بين بريق نظراتي

سأنسى لذة الكلماتِ

حين كتبتُها عشقًا

فصارت تملؤُ الدّنيا

تجوبُ الكون

ترقصُ بينَ صفحاتي

تطيرُ فتلهمُ العشّاقَ..

تُسكِرُهُم

تعلمُهُم صنوفَ الحبِّ

تبثُّ الشوقَ في دمِهم

وترْسُمُ حلمَنَا الورديَّ

تداعبُ حبّنا الصّافٍي

تُـثــبِّـــتُهُ..

ترفرفُ في حَوَاليْنا

كسرب ٍ من فراشاتِ

سأنسى كلَّ كلماتي

سأحرقـُها

سيفنى لحنُ أغنيتي..

فقد جفت معانيهِ

تلاشتْ منه أحْلامِي

فصارَ كبعض أناتِ

سأنسى عهدَك الخدّاعَ..

أمنيتي بأن تبقى..

بأن الحبَّ لن يفنى..

على طول المسافاتِ

سأنزعُ نشوة العشّاق من قلبي..

ولو كادت تُمزقه

سأمحو من مُخيّلتي..

جنوني بك

وسهدي طولَ ليلاتي

وقد أنسى بريقَ البدر

إن أحيا بيَ الذكرى..

وبثـّك بين نبضاتي

سأقطِف كلَّ ورداتي..

فقد كانت رسولي لك..

وشاهدة ً حِكاياتي

إذا فارحلْ..

وإن قابلتني يومًا..

فلا تهتمّ

فليست كلُّ أمنيتني..

بأن ألقاك تتبسّم

وليست دونك الدنيا..

لهيبَ النّار أو علقم

ولن أبقى هنا وحدي..

أقاسي من عذاباتي

إذا فارحلْ..

ولا تندمْ..ولا تخجلْ..

وإن قابلتني يوما..

فقل كنّا..!!!

أو امض ِ كمن رأى شخصًا..

فقال :"أكُـنتُ أعرفه؟!!"

"أكُـنتُ حبيبَه يومًا؟!!!"

فيمضي دونَ أنْ يعلم!!!

إذا فارحلْ..

ولا تأبه لمن خلفك..

فلن أفنى هنا دونَك..

ولن أبقيكَ في قلبي..

سِوَى ذكرى..

تمرُّ بخاطري يوما..

وأطردُها..

فما تبقى للحظاتِ

***