السبت، 28 مارس، 2009

دكــــــــتـــــــور!!


دكــــــــتـــــــور!!

باسرح كتير وقليل

واقول يا عيني يا ليل

كان إيه يا رب رماني..

ع الغلب ده والويل؟!!!

أيوه افتكرت خلاص..

الفرحه والتهليل..

وشهادة الثانويه

مجموع مكانش هزيل

ده عشان يكمل ميه

فاضله جوز زغاليل!!!

***

واتلموا أهلي عليا

قالولي يا دكتور

وانا اقول طب اهدوا شويه

بلاش نعيش الدور

يقولوا لأ هنعيشه

ده يوم هنا وسرور

بصيت لقيتني هناك

ووقعت في المحظور

من غير ما أفكر حتى

ولا أستخير وأشور

***

ولقيتني شايل بالطو

ماشي كأني وزير

طاير كده في العلالي

أحلى من العصافير

دخلت أنا م الباب

لقيت هناك طوابير

باقول في إيه يا ترى

لعل كل ده خير

قالولي دول دفعتك

داخلين لابو الدكاتير

الحق بأى محاضرتك

زاحم مع الطوابير

قلت مش مشكله

الزحمه عادي كتير

بس المهم إني أقعد

لو حتى صف أخير

وطبعا كنت بحلم

ودي آخرة التأخير

وبرضه قلت هاصبر

ده الصبر أجره كبير

وقلت هاحاول أفهم

واملى الدماغ تفاكير

والله ما فهمت حاجه

ده كلام ولا الأساطير

***

ومر أول يوم

وحزنت أنا وبكيت

وعرفت م اللي جرى

إني خلاص طبيت

طب أعمل إيه يا ترى

دورت أنا ولفيت

قالولي تاخد درس

وتبقى واد فحيت

سألت ع التكاليف

قالوا يادوب فتافيت

دول كلهم كام ألف

والأمر يا ابني بسيط

تنحت أنا وبرقت

قالولي : ليه اتخضيت

ده لسه فيه الكتب

وييجي ألفين شيت

والزحمه في المشرحه

ولابد تبقى غتيت

وتعيش هنا بصحتك

وتطنش الإتيكيت

وعلشان تشوف جثتك

لازم تكون عفريت

ع الأرض أنا طبيت


***

وفقت بعد يومين

وقلت لازم أنا

أشوف طريقي منين

فضلت في الغلب ده

على حالي ست سنين

كانت خلاص صحتي

دخلت على الستين

والسمع راح والنظر

والقلب والشرايين

والضغط عندي علي

أصبح تملي متين(200)

وبصيت لقيت صحبتي

وشلة الخايبين

ارتاحوا واتجوزوا

بدل الجوازه اتنين

***

وبعد طول مشوار

وعذاب وصبر غريب

طلعت م الكليه

والإسم إني طبيب

باقبضلي كام ملطوش

ميعمروش الجيب

ميأكلوش عيش حاف

مش لحمه والا زبيب

فكرت اشغل مخي

وافلح واكون كسيب

وقلت ألعب كوره

لقيتني مش لعيب

طب ولاّ أركب تاكسي

أو حتى أبيع يانصيب

لقيت الناس لاموني

قالولي لأ كده عيب

بأى بعد كل علامك

تروح كده وتخيب

طب أعمل إيه دلوني

ومنين يا خلق أجيب

عشان أعيش مرتاح

من غير ما يبقى ده عيب

وافضل كده محتار

واتعب من الأفكار

وارجع واقول ده نصيب

لو مهما أعمل إيه

لازم النصيب هيصيب


***


14 هاه..إيه رأيك؟:

هههههههههههههه
صحيح ده نصيب ..
حلوة اوى با شادى..
اهو فخ وروحناه برجلينا..
 
على رأيك

فخ متفخفخ ورحنا له بكامل إرادتنا واحنا في كامل قوانا العقليه

اللي غايظني بأى إن بابا - الله يرحمه - كان دكتور ومع ذلك مقاليش على أي حاجه ولا وعاني ع اللي هيجرالي قال إيه عشان آخد قراري من غير ما حد يأثر عليا

يلا

اللي قبلنا قالوا

العايط في الفايت نقصان من العقل

الحمد لله على كل حال

شكرا لمرورك

دمت بكل خير
 
بجد دي الحقيقة ربنا يستر علينا
طبعا انا مش طبيبة بس عارفة اللي بيحصل وبشوف بعيني
وبفكرك باغنيه السيدة العظيمة تحية كاريوكا اللي كانت بتقول
بفلوسك وبمالك هاتنول اللي في بالك
لا باصلك ولا فصلك ولا حسنك وجمالك
 
طبعا
كله نصيب
تحياتي يا شادي

يخربيت زغاليلك
هههههههههههههههههه
 
سما الحب

أهلا بيكي

منوراني

وطبعا زي ما الأغنيه بتقول إحنا في الزمان ده كده ما يعيب الراجل الا جيبه ومعاك قرش تسوى قرش...للأسف

ولكني باختلف معاكي بشده في كون تحيه كاريوكا سيده عظيمه!!!!


إيه اللي خلاها عظيمه يعني ؟!!!!

وبأي مقياس ؟!!!

ما علينا

برضه منوراني

شكرا لمرورك
 
الجوهري

أهلا أهلا بزبون المحل

ومالك ياض ومال الزغاليل

هي زغاليلي والا زغاليلك

والا علشان معندكش زيهم يعني

يا أخي روح اشتري وبطل قر ع الناس
 
كانك بتتكلم عن قصه حياتي يا شادي
بس انا اللي استاهل
ياما نصحوني ماتغرش بمجموعي الكبير
بس انا قفلت دماغي وقلت لازم ادخل طب
يالا .....اللهم اني لا اسالك رد القضاء
ولكني اسالك اللطف فيه


تسلم ايدك يا شادي علي الكلام الجميل والمعبر عن حالنا

شريف شحته
 
شريف شحته

يا هلا يا هلا

شريف مره واحده عندي في المدونه

طب مش هتمشي غير لما تتغدى

خلاص أنا حلفت

ويا باشا دي قصة حياة معظم الدكاتره

الحمد لله على كل حال
 
انا ما كنتش فاكره ان الحكايه للدرجه دى
و الموهبه علىالدرجه العاليه دى
بجد روعه
ما شاء الله
المزيكا ما خانتكش الا ف قشور بسيطه جدا ما تتلاحظش من روعتها و تمكنك من ادواتك


بجد بجد روعه
 
ســـــــهــــــــــر


أهلا بيكي

منوره المدونه

وشكرا على كلامك الرقيق

أسعدني مرورك جدا
 
نظرة
فى اللغة نظر إلى الشىء أى أبصره وتأمله بعينه ونظر فيه أى تدبر وفكر.
فهى مدونة جديدة بفكر جديد سنعرض من خلالها نظرة للمجتمع بوجه عام وإلى الشباب بوجه خاص.
ترى عندما تنظر إلى هذا المجتمع ماذا سترى؟!
هذه المدونة لن تنجح إلا بمشاركتكم والإستماع إلى الأراء كلها . فأنتم الشباب عماد الأمم وبكم تصنع الحضارات
وسأحاول أن تمثل الموضوعات أراء مجموعة من الشباب وليس رأى شخصى.
المدونين فى هذه المدونة :
http://batoot-haboob.blogspot.com/بطوط الحبوب
http://ghoneem.blogspot.com/ دكتور غنيم
modawen5ana.blogspot.comأسماء رمضان
محمد غالية

أسف لعدم ردى على الموضوع وخروجى عن اصل الموضوع
 
جميله اوي اي دكتور
تسلم ايد حضرتك
 
نظره

إن شاء الله نتابع المدونه الجديده

وألف مبروك

وبالتوفيق دائما
 
اسراء نايف

أهلا بك

مرورك أسعدني جدا

شكرا لك
 

إرسال تعليق