الجمعة، 26 يونيو، 2009

تااااج تاني..ربنا يزيد ويبارك..


ولتاني مره على التوازي يجيلي تاج..شكلي كده بقيت فاتح المدونه عشان ال..ال.. (هو جمع تاج إيه).. آه ..بقول شكلي بقيت فاتح علشان التاجز (إنجليزي..أبوسترف إس)..

المهم التاج جايلي من سول صاحبة المدونه الرائعه "voice of mine".

وأولا عاوز أعتذر جدا على تأخري جدا في إجابة التاج ، لكن ظروف والله (على فكره هي نفس الظروف اللي أخرت الجوهري برضه) ، وثانيا عاوز أشكر سول على تمرير التاج ، وثالثا عاوز أقولها ربنا يسامحك علشان التاج بجد تقيل..تقيل يعني..

نبتدي بأى نجاوب

من أنت؟

شادي ، طالب طب ، بني آدم عادي جدا ، من عامة الشعب يعني

وما الذي تفعله هنا؟

بجاوب التاج اللي سول باعتاهولي

إسرائيل تقصف كل جنوب ممكن بحثا عنك ، أي شمال ستقصد؟

أقصد إيه؟؟ ده أنا كل حياتي شمال ، شمال أفريقيا ، وشمال مصر ، وتاني بيت على إيدك الشمال وانت داخل شارعنا :)

وبعدين نحن نختلف عن الآخرين ، إحنا مسايسين أمورنا ، وبنسمع الكلام ، وبقالنا سنين بنزق عجلة السلام لما نفسنا انقطع ، يبقى إن شاء الله مش هيضربوا جنوبنا إلا لما يخلصوا كل جنوب آخر ، عملية وقت مش أكتر..

أنت مكلف بحذف حرف من حروف اللغه العربيه ، أيها ستختار ولماذا؟

مينفعش أحذف أي حرف ، أصلي لو حذفت أي حرف مش هاعرف أكمل البوست ده ، وانتوا مش هتفهموا أي حاجه أنا هاكتبها..

لو قدر لك أن تدخل السجن فما هي القضيه التي تتمنى أن تدخل بها إليه؟

ربنا ما يكتبها علينا ، بس يعني لو هادخل يبقى أدخل بحاجه محترمه ، قضيه سياسيه مثلا (ربنا يجعل كلامنا خفيف عليهم)

بالمناسبه..منذ متى اكتشفت نفسك؟

لسه والله ، هادور ولما أكتشفها هاقولكم ، ولو إن نادر جدا اللي بيكتشف نفسه بالظبط

على مفترق طريق الإفتتان ، اليمنى تقول : "إلى حلمك" واليسرى تقول : "إلى ما لم يحلم به البشر" ،أي الطرق ستسلك؟

أولا أنا مش شايف إن ده افتتان ، أنا شايف إن (إلى حلمك) طموح مشروع طالما إن الحلم حلال وشرعي ، لكن "إلى ما لم يحلم به البشر" هبل أو طمع ، وبالتالي هاختار "إلى حلمك" ، وربنا يوفقني وأوصل ، ولو موصلتش كفاني شرف المحاوله..

نحن لا نعيش حياتنا بل نتعلم فيها كيف نعيش ما تعليقك؟

جايز برضه

بجمله واحده فقط إكتب تعريفا لكل كلمه من الكلمات الآتيه:

الوطن

أي مكان بحس فيه بالأمان ، الدفء ، الألفه ، الإنتماء

الأم

الوحيده اللي بتحبك زي ما انت كده ، ومهما كنت وحش

الليل

سكووون ، قد يشتعل دفئا وحب ، وقد يقتلك فيه البرد والخوف والوحده

الحب

بيتهيألي الحب ملوش وصف معين ، جايز يكون إنك تشتاق لحبيبك حتى وهو في حضنك ، إنك متشوفش في الدنيا غيره ، إنك تبقى في عز حزنك وتنساه بابتسامة منه ، أو إنك تبقى في قمة السعاده وتنساها لمجرد إن حبيبك زعلان..و إنك ترضى بدون تردد تضحي بحياتك عشانه ، وجايز يكون عذاب ملوش دوا..

أقولكم لما أجرب هابقى أوصفهولكم بالظبط

أمريكا

فرعون

المرأه

لا بحبك ولا باقدر على بعدك ، شر لا بد منه ، مش كلهم بس معظمهم :)

الصمت

حاله من الاكلام

الإنترنت

ضروره تستحيل الحياه بدونها ، على الأقل بالنسبة لي


إختر منصبا واتخذ قرارا؟

رئيس الجمهوريه ، إقالة وزير التربيه و التعليم ، الراجل ده خنقنا بصراحه

قيس ، عنتره ، جميل ، هم الذين يقولون شعرا ، وليلى وعبله وعزه "صموت" لماذا هذا التغييب للمرأه؟

ده كان زمان ، دلوقتي صوتهم قد كده ، وعلى رأي مش عارف مين البنت بقت زي الولد

"أن تكون مطلوبا لارتكابك جريمه ، خير لك من ألا تكون مطلوبا مطلقا"
هل تتفق مع هذه العباره؟ علل.

لأ ، هو يعني عشان أكون مطلوب أبقى مجرم ، يا سيدي خليني قاعد في بيتنا أحسن

إلى أين تمضي كلمات الحب بعد أن نقولها؟

إلى قلب الحبيب ، وبتستقر إلى الأبد

هل تجد علاقه بشكل أو بآخر بين المرأه وقطاع الطرق؟

طبعا ، حتى اسألوا أي واحد متجوز

هذا فراق بيني وبينك ، متى ولمن تقولها؟

لأي خاين

كيف هو غدا؟

لا يعلم الغيب إلا الله

تمرر التاج ده لمين؟؟

والله التاج رخم شويه ، ومش عاوز حد يدعي عليا

اللي عاوز ياخد التاج يتفضل (وأنا متأكد إن محدش هيعوز)


سلام






4 هاه..إيه رأيك؟:

أهلا شادي
حلوة الإجابات
تاج رخم رخم
خلصت منه يا بختك
علي فكرة جمع تاج تيجان
هههههه أبوستوروف إس
دا انجليزي دا يامورسي؟!

آه الظروف آه عندك حق
ربنا بس يجيب العواقب سليمه ويطلع تأخيرنا دا بفايده
 
السلام عليكم و رحمة الله و بركاته

طبعا كان مفروض اعلق على التاج دا من زمان جدا

بس معلش بئالى فترة مش متابعة

الاجابات جميلة جدا

بس لى وقفة عند "أولا أنا مش شايف إن ده افتتان ، أنا شايف إن (إلى حلمك) طموح مشروع طالما إن الحلم حلال وشرعي ، لكن "إلى ما لم يحلم به البشر" هبل أو طمع ، وبالتالي هاختار "إلى حلمك" ، وربنا يوفقني وأوصل ، ولو موصلتش كفاني شرف المحاوله.."

انا مش باعترضعلى الحلم .. لان طبعا زى ما قلت انه طموح
لكن لما يكون حلمك هو سبب افتتانك
يعنى كدا كدا اخره فتنة

يبئا اتنازل عنه احسن
دا على حسب ما فهمت من السؤال

لكن طبعا كلنا لينا احلامنا و يارب نحققها

دمت بود
 
منور يا جوهري

وطبعا هو تاج رخم فعلا

بس حلو والله

نورتني ياض
 
سول

أهلا بيكي

ويا ستي ولا يهمك

كلنا بقالنا فتره مش متابعين ومتأخرين

بالنسبه لمسألة الحلم أنا معاكي

لكن أنا قلت لو الحلم حلال وشرعي

يبقى إن شاء الله عمره ما هيكون فتنه

بالعكس ده ممكن يبقى كله خير

..........

شكرا لمرورك
 

إرسال تعليق