الثلاثاء، 14 ديسمبر، 2010

عاوز أتجوز..!!


أخيرا..انتهيت من دراستي ، وبدأت مرحلة جديدة في حياتي ، مرحلة العمل ، وبدأت أفكر في أن أكمل نصف ديني ..(علام واتعلمنا..شغل واشتغلنا..يبقى مش فاضل غير الجوااااااااز)..هكذا بدأت أفكر ، أو هكذا هو الطبيعي ، أو هكذا هي سنة الحياه ، وبما أنها كذلك ، وبما أن الزواج أمر حتمي - للأسوياء - ولابد منه ، فلابد إذا للزواج من زوج - اللي هو أنا - وزوجه.

وبما أن الزوج - اللي هو حضرتي - موجود بالفعل حي يرزق يعيش ويتعايش ، وبما أنه - اللي هو حضرتي برضه - طوال عمره مستقيم و راجل دغوري ، فهو إلى الآن غير مرتبط - لا رسميا ولا عاطفيا - بأية أنثى على وجه البسيطه ، وجعلني ذلك أفتح المجال لخيالي في تخيل تلك التي تصلح أن تكون لي زوجة ولأولادي أما ، احترت قليلا - أو كثيرا - ثم بدأت في اشتراط صفاتها بكثير من الطمع - مهو مش أصوم أصوم وافطر على بصله - ووجدتني أسرد قائمة متخمة بصفات قلما تجتمع في امرأة واحده ، ثم أشطب هذا ، وأمسح ذاك ، وأبدل وأعدل ، حتى لأني لم أعد أتبين القائمة من كثرة الشطب والتعديل.

----------------------------------

* متدينه : آه متدينه ، بس مش متشدده يعني ، مش كل حاجه عندها حرام وبدعه وضلاله ، وبرضه مش فاتحاها ع البحري وكل حاجه عندها حلال ، وبرضه متدينه جوه وبره ، مش بره بس في اللبس ، ومش جوه بس وتقول ربنا رب قلوب ، تاخد بإيدي إلى صراط الله المستقيم ، تساعدني على الإلتزام الديني الحقيقي ، مش الظاهري ، تربي ولادي تربيه دينيه سليمه ، فيكونوا "ولد صالح يدعو له"

* على خلق : طبعا لازم ، مهو مينفعش تكون متدينه وسيئة الخلق يعني ، يعني تبقى عارفه كويس ان "الدين المعامله" ، طب بمناسبة الخلق ، هو ينفع أتجوز واحده كانت بتعرف ولاد ؟!! طب ينفع يبقى لبسها مش شرعي؟!! طب لو بتكلم ولاد بحجة الزماله ؟؟ أو لبسها خارج شويه صغيرين ؟؟؟ وطب لو بتعمل ده كله عن غير فهم؟؟؟ بصوا...مينفعش..فيه حاجات لا يمكن أبدا أتنازل عنها في البنت اللي هارتبط بيها.

* الحياء : يا سلام ، أحب أوي أوي البنت اللي عندها حياء ، بس مش الخجل اللي يخليها تفرط في حقها ، أو متعرفش تدافع عن نفسها وتقول بتكسف ، لأ الحياء اللي بيخليها رقيبه على نفسها ، ومبتتصرفش غلط عشان عندها حياء مني ومن ربنا ، وحياء انها تقابلني أو تقابل ربنا وهي غلطانه ، مش هابقى محتاج مثلا أنزل معاها وهي بتشتري لبس ، لأنها لوحدها هتشتري لبس شرعي ، لأن حياءها هيمنعها من التبرج ، مش هاحتاج أقولها تعامل زمايلها في الشغل ازاي ؟؟ ، أو تعامل أهلي ازاي ، مش هاراقب تصرفاتها لأن هي بتراقب نفسها..

* العقلانيه : الست العاقله دي نعمه ، وربنا يحفظنا من الست الشعنونه المجنونه ، ممكن بكل سهوله تجنن الراجل..

* متعلمه مثقفه : وماقصدش الشهاده اللي معلقاها ع الحيطه ، ياما ناس معاها شهادات وكأنهم مش متعلمين..

* النضج : تبقى عارفه يعني إيه جوااز ، وفاهمه إنه رحلة كفاح مش مصيف ، وانه انتقال من مرحلة الراحه والإسترخاء واللا مسئوليه إلى مرحلة الجد والتعب والمسئوليه وتأدية رساله في الحياه ، وإنجاب أبناء قادرين على العطاء ، والارتقاء بالوطن ، وتبقى فاهمه إن القفه أم ودنين يشيلوها اتنين ، لو يوم هي تعبت من المشي والشيل ممكن أشيل من نصيبها شويه ، أو أشيله كله على حسب تعبها ، لكن في نفس الوقت لو أنا تعبت لازم تشيل مكاني شويه..

* الرضا والقناعه : بحق وحقيقي مش كلام ، أصل يا بنت الحلال أنا محيلتيش غير مرتبي ، آه ليا دخل تاني ، بس لنفرض إن الدخل التاني ده وقف لسبب ما ، تعبت مثلا ، أو حتى بدون سبب رزقي كده ، ساعتها نفسي تمشي البيت بالمرتب وانتي راضيه ومبسوطه ، مش وانتي زهقانه مني ومن عيشتي الهباب..

* الإجتماعيه وصلة الرحم : نفسي في واحده تقربني أكتر من أهلي واصحابي ، متبقاش زي البنات اللي بتبقى عاوزه الراجل بطوله ، من غير لا أهل ولا قرايب ولا اصحاب ولا حبايب غيرها ، وكأنه سقط عليها من السماء ، لا أم ولدته ولا أب صرف عليه دم قلبه لحد ما بأى فارس أحلامها

* روحها حلوه : فيها ناس أول ما يتكلموا معاك تحبهم وترتاحلهم ، نبرة صوتهم بتدخل القلب على طول ، لا فيها حقد ولا كدب ولا خبث ، من نقاءها تلاقيها عششت جواك ، اخترقتك ، وأثرت فيك تأثير أكبر من حجمها بكتير..

* بنت ناس طيبين : أكيد البيت له نصيب الأسد في التأثير على الشخصبه ، وإذا كان الأهل كويسين وأحسنوا التربيه فغالبا سيكون الأبناء كويسين (إقلب القدره على فمها تطلع البنت لأمها) ، وعشان برضه لو حصلت مشكله في يوم وراحت اشتكتني لأبوها يحكم عقله ، مش يسمع لبنته وخلاص ، وإن كنت أنا من أنصار ألا تخرج المشكلات الزوجيه بره عتبة البيت ، أيا كان حجمها ، إلا بأى إذا استعصى علينا أنا وهي حلها

* هادئه ، مرحه ، تجيد الاستماع أكثر مما تجيد التحدث (صعبه دي) ، قابله للإقتناع بالرأي الآخر ، وقابله للنقاش ، تحتويني حين انفعالي..

* متكونش أطول مني ، ولا تكون تخينه ، فيما عدا ذلك لا اشتراطات شكليه معينه ، المهم أن أراها أنا جميله ، وأن تتقبلها عيني من أول نظره

----------------------------------

انتهت القائمه ، كانت أطول كثيرا من ذلك ، لكنها صارت هكذا بعد القص والتهذيب والإختزال ، ألم أقل لكم أنها صفات قلما تجتمع في امرأه؟؟
وإن حدث واجتمعت فلماذا تقبل من هي بتلك الصفات أن تتزوج بي؟؟؟ ماذا لدي أنا لأقدمه لها؟؟ هي تستحق أفضل مني بكثير ، المهم أني لن أيأس وسأواصل البحث ، وربما أجدها ، وربما تقبل بي زوجا إذا كان حقا كما يقولون "مراية الحب عميا"


((أكتب(ي) صفات فتاة( فتى) أحلامك ، ربما تتفق أو تختلف معي ، فللناس فيما يعشقون مذاهب))

31 هاه..إيه رأيك؟:

يا متفائل
.
اسمع بقي من الجماعه المتشائمين اللي زي حالاتنا
.
ف الكلية اصبر لحد ما تخلص وتشتغل .. خلصت .. دخلت الجيش ... اصبر لحد ما تدخل الجيش
.
.
عمر ما المعاناه بتنتهي بعد خلاصان الكلية .. لسه معاناه التجنيد يا حلو
.
.
لو حظك بمب .. ومالكش جيش او خدت اعفا
خش علي معاناه الاسعار
.
.
لو حظك بمب وطلعت ابن ناس مريشين .. وفرولك شقة
.
.
اعتقد انك تبقي اختصرت كتير
بس اوعي تفكر ان كدا المعاناه خلصت
.
كونك تلاقي واحدة بمواصفاتك اصلا دي قمة المعاناه
.
.
لسه بقي هتعاني بالجامد قوي
مواسم بقي وزيارات وهدايا وخروجات
.
لو ابوها راجل متشدد مصلحة اوعي تزعل
غالبا مش هيخليك تزورها غير مرة في السبوووع ... عسل قوي قوي قوي
.
دا يوفر عليك زيارات يا معلم
.
.
خش بقي علي معاناه الشقة وتوضيبها
يووووووه
يابني اصرف نظر احسن وخليك بعقلك
 
ادم المصري

أولا أهلا بيك

ثانيا

يا باشا أنا والله عارف كل اللي بتقوله ده

وكل المشاكل اللي حضرتك تفضلت ورصيتهالي دي عندي

الجيش ، توضيب الشقه ، تكاليف الخطوبه اللي مش عارف هاجيبها منين ( بس ناوي يبقى أبوها متشدد ، لأ رجعي ، أقولك من يثرب عشان يقطع رقبتي لو فكرت فيها بس ، دي تبقى قمة التوفير)

لكن رغم كل المعوقات لا مانع من الحلم

لو بطلنا نحلم نموت يا عمنا

نورتني :)
 
ما تريد ليس مُعجز ..
جميع ما ذكرت بلا استثناء هي المواصفات التي حث الشرع
على توافرها ..

قد يكون نادر كما ذكرت .. "وقد احببت النظرة الواقعية التي تنظر منها"

من رام المميز النادر يتعب حتى الوصول ,,لكنه على الارجح سيصل..

وفقك الله...
 
Lossy

أهلا بك

نورتي المدونه

وطبعا من أراد التميز فعليه السعي - جاهدا - إليه

وأعلم أن ما أطلبه ليس معجزا ولكنه صعب ، ويحتاج إلى صبر للوصول إليه

وإن شاء الله أملك من هذا الصبر الكثير

أسعدني وشرفني مرورك بمدونتي

شكرا لك :)
 
مش عارفه اقولك ايه بس حاسه انك بتتكلم عني
:D
طلبك موجود يا فندم
 
green eyes

أهلا بيكي منوره المدونه

يعني فيكي كل اللي طلبته

وكمان جرين آيز

لأ ده كتير

عنوان بيتكم بسرعه :)
 
جميلة كانت مواصفات فتاتك

أتمنى لكلانا كل التوفيق في الإختيار

تحياتي يا طبيب
 
انا انا انا هههههههههههههههههه
هكتبلك رقم البطاقه والاسم والعنوان وتاريخ الميلاد وكله كله هههههه
لا بجد ربنا يوفقك يارب للخير دايما
وطول ماا انت متقي ربنا دايما في حياتك ربنا اكيد هيرزقك بالخير
 
لا هاتلاقي ان شاء الله الإنسان التي ترتبط بيه وتكملوا حياتكم سوا ...أنا أيضا اتفقك معاك في تلك المواصفات ...ولكن اكيد موجودة ...دور بس كويس...وبعدين هي مش هاتكون بيرفيكت يعني هاتلاقي فيها عيوب برضة ..اي حد كدة
اتمنى لك التوفيق
 
اول مره اجي هنا ومش أخر مره ان شلء الله
علي فكره انتا هتقص من هنا بردو
لان ممكن تقابل واحدا
وتوقعك فيها
واول ماتيجي تقلها انتي كنتي مرتبطه مثلا قبل كدا
ممكن تقلك لا....وهي كانت مرتبطه
طب هتعرف منييييييين انتا؟؟
اولا لاذم يكون في تغيير شويه فالحاجات دي
وخليك واثق شويه فاللي قدامك مش تحط ليها شروط
علشان هي كمان ماتحطلكشي شروط
وتلاقي نفسك خسرت
فأحسن حاجه.
سبها علي ربنا.......وهو هيجبلك واحدا بأذن الله تكون نصك التاني فعلا
ربنا معاك يارب
 
اه نسيت سوري
هسرق اللينك بتاعك علشان احطوا عندي
ماشي؟
 
تصدق اني انا حبيت البنت اللي بتتكلم عليها دي وعايزه اتجوزها .... : ))))

ياسيدي وايه المشكله في بنات كتير بالمواصفات دي وفوق ده كله جمال كمان الدنيا لسه ما بقيتش بالبشاعه دي .... انا لي صحابات كده بس انت تأشر انا خاطبه محصلتش : ))))))))
ربنا يوفقك
 
مواصفاتك يا دكتور هي ما يتمناه كل شاب في فتاته التي ستكون زوحته،يأتمنها على عرضه وماله وأولاده،،تساعده في تنشئة أولاد واعيين مثقفين(وبجد الواحد خايف إن الجيل اللي بعده يطلع أبوظ منه،،وأبوظ من كده مفيش!!)وتعينه على الوصول للراحة النفسية والرضا عن النفس والضمير،،ورضا الله

لا أعتقد أبدا أن مواصفاتك صعبة...

أعانك الله..

مبروك تجديد شكل المدونة،،وعقبال ما نقول مبروك الفرح..بس فرح فرح غير كل الأفراح،مش زي اللي كتبت عنه في الفرح!!
 
د. مُحمّد رضَا

أهلا بيك

وأسأل الله أن يرزقني وإياك زوجة صالحه

دمت بخير :)
 
صمت المشاعر

مش عارف ليه محسسيني إني عامل إعلان في الجرنال

كل واحده تدخل تقول أنا

طب مهو مين هيشهد للعروسه

عموما

إنتي نورتي المدونه

ومرورك أسعدني

وربنا يوفق الجميع لما فيه الخير
 
Hu-man

أهلا أهلا

جميل تفائلك

أضاف لي بعض التفاؤل

شكرا لك
 
sony2000

أهلا بيكي

###واول ماتيجي تقلها انتي كنتي مرتبطه مثلا قبل كدا
ممكن تقلك لا....وهي كانت مرتبطه
طب هتعرف منييييييين انتا؟؟###

مهو أنا مش هاسألها هي..!!

###علشان هي كمان ماتحطلكشي شروط
وتلاقي نفسك خسرت###

لأ تحط شروط زي ما هي عاوزه ، إحنا بيهمنا ، ده إحنا جدعان أوي يعني

###اه نسيت سوري
هسرق اللينك بتاعك علشان احطوا عندي
ماشي؟###

يا سلام

ده هو اللينك عاوز يتسرق كده على طول

طبعا ده شيء يسعدني

شكرا لمرورك
 
توهة

آه هي تتحب فعلا

بس انا كاتب ده كله عشان أنا اللي أتجوزها مش حد تاني ييجي ياخدها ع الجاهز

بس بجد إنتي خاطبه؟؟؟

طب فين الصور طيب والا هنشتري سمك في ميه


نورتيني :)
 
قلم

وآدي واحد كمان متفائل

طب والله كويس

فيه أمل أهه

بالنسبه للفرح

مبادئي ثوابت لا تتغير

ومش هاعمل زي الناس..!!!

نورتني
 
أنا لفت نظري الكلام علي الفرح فدورت في المدونه علي الموضوع وقرأته وبصراحه ..... أحييك وبشده الهرج والمرج اللي بيحصل في الافراح ده مش طبيعي زي مايكون حالة هستريا بتصيب الناس وبصراحه لا احترم ايدا ابدا الرجل الذي يرقص ويقلد النساء يثير اشمئزازي كيف اراه رجلا بعد ذلك يعتمد عليه ... والفتاه التي ترقس لا ادري حقا اين يذهب حياؤها في هذا الوقت واعلم فتيات كتر ملتزمات جدا ولكن عند الفرح القواعد تختل .... ممكن عشان كده بيقولوا اني كئيبه : )))))))))
بالنسبه لوموضوع الخاطبه انا باخد كاش الاول مقدما قبل اي حاجه وبدولار كمان : ))))))))))))))

تحياتي
 
واحد من الناس

ودى واحترامى

حضرتك عايز واحدة كاملة الاوصاف

صدقنى دا موجود لكن نادر جدا

نادر انك تلاقى فتاة احلامك

لكنها موجودا

نصيحتى لا تستعجل وان شاء الله ربنا ينولك الى فى بالك

ودى واحترامى

كنت هنا اليوم تقبل مرورى
 
توهه

أهلا بيكي مره تانيه

وبصي يقولوا اللي يقولوه

المهم إنتي تثبتي على مبدأك

بالنسبه للفلوس

أنا عمري ما شفت عمله في حياتي غير الجنيه المصري

لو يمشي معاكي

أدفع على طول

توته على كبوته يعني مش تاتا تاتا

نورتيني :)
 
يمين في يمين

أهلا بيك

منور المدونه طبعا

ويا سيدي مفيش أصلا واحده كاملة الأوصاف أصلا

لكن من حقي إني أحلم

ولسه قدامي وقت كبير أدور فيه براحتي

وإن شاء الله هاوصلها

أسعدني مرورك

شكرا لك :)
 
ممممممم
مواصفاتها بجد معقولة
و ان شاء الله تلاقيها
انظر حولك كويس بس و انت اكيد هتلاقي بنت بالصفات دي
و كمان فيه ميزة حضرتك من الشرقية و بجد الشرقية دي من اكتر البلاد اللي فيها دين - ده من خلال مقارنة بين اسماعيلية و الشرقية - و اخر مرة نزلت بلبيس شوفت بنات كتيرة كويسة و فيها صفات حضرتك
بس ده كان من سنين ما اعرفش بقي حصل ايه الايام دي :D
بس عندي ملحوظتين :
اولا : من اراد فاطمة فعليه ان يكون عليا
ثانيا : حضرتك عددت صفاتها الكويسة بس لازم تحط في الحسبان ايه الصفات السيئة اللي تقدر تتحملها
عشان الوحاشة دي شئ نسبي
كمثال : في انسان يتحمل ان المدام بتاعته تبقي عصبيية و حد تاني ما يقدرش بتحمل العصبية تماما
فبالتالي انا من رأيي ان الواحد يحدد في شريك حياته ايه الصفات الوحشة اللي يقدر يتحملها قبل ما يطلب الصفات الحلوة
و بالنسبة لمواصفات فتي احلامي
فانا معنديش فتي احلام
انا هخلص دراستي و في خلال دراستي هعمل ستيب وان و تو من المعادلة الامريكية , اخلص الامتياز و روح امتحن بارت تو من ستيب تو و ستيب ثري من المعادلة و اخد ريزندسي هناك عشان احس اني اتعلمت طب صح مش العك اللي بنتعلمه هنا
و ربنا يحلها بقي بعدها
ممكن ابقي ساعتها افكر في مواصفات فتي احلامي
ملحوظة : انا ممكن اغير رأيي في الاجازة و اجي اقول ان عندي فتي احلام بس اكمن الواحد دلؤتي في الفترة التي تسبق الامتحانات فبيبقي تركيزه في دراسته و مستقبله
بس مع راحة الاجازة كل الطموح بيروح :D
 
ZakZoka

أهلا بيكي

بالنسبه للصفات السيئه فالطبيعي إن كل واحد ليه عيوبه

والطبيعي إني أستحمل العيوب دي ، جايز مينفعش أعدد العيوب اللي ممكن أستحملها

لكن زي ما بيقولوا "لجل الورد ينسقي العليق"

يعني لو هي إنسانه كويسه أكيد هتبقى عيوبها بسيطه ومحتمله

أعجبني طموحك جدا

بس مش عارف ليه مش عارف أركبه على بنت

هو طموح ولد خالص

أو جايز بيتهيألي

والبنت بقت زي الولد فعلا

نورتيني بجد

شكرا لك :)
 
ممكن أفهم من تعليقك الأخير على zakzokaإنك بتعارض طموح الفتاة؟؟يعني مثلا مش هتخلي زوجتك تشتغل؟ولو هي مبدعة في مجال ما...هتديها الفرصة وتساندها حتى لو برزت عنك؟؟
 
قلم

أهلا بيكي لتاني مره

طبعا أنا لا أعارض أبدا طموح الفاه

ولو زوجتي برعت في مجال معين هاساعدها طبعا

بشرط إن ده ميكونش على حساب ولادها وأظن ده حقي وحقهم (اللي هما الولاد يعني)

لكن من تعليقي على zakzoka يتفهم إني بعارض نوع معين من الطموح

يعني فكرة إنها تسافر بره لوحدها ، حتى لو كان للدراسه ، وكمان إنها تعطل حياتها وتأجل زواجها لغاية لما تخلص طموحها في مجال العمل

طب هتتجوز إمتى؟؟؟

أنا متعلم آه ومنفتح ماشي ومعنديش عقدة من إن مراتي تشتغل أو تبقى حاجه كبيره في شغلها ، مش هافكر إني ساعتها جوز الست ولا حاجه الكلام ده خلص من زمان

لكني ما زلت رجلا شرقيا :)

نورتي
 
ربنا يوفقك و تتجوز و ترجع تيجي تقعد جنبنا في شارع الطهقانين
 
مدام طهقانه

يا مراحب

ويا رب بس ميكونش الجواز هو سبب الطهق في حياتك

هو أكيد من ضمن الأسباب بس الحياه كلها كده يبقى منتهمش كل حاجه في الجواز يعني

وإن شاء الله ربنا يرزقني ببنت الحلال وآجي أقعد جنبكم في أي حته إنتوا عاوزينها

نورتيني :)
 
ربنا ينولك اللي انت عايزة

وياتري انت لما تلاقي البنت دي هتتعامل معاها ازاي

لأن طبعا البنت دي في الزمن ده عملة نادرة

كل سنه وانت طيب

:))
 
شمس النهار

أهلا بيكي

وطبعا طبعا لو لقيت البنت دي

هاشيلها فوق فوق فوق دماغي

لأ شويه

هاحطها جوا قلبي واقفل عليها

وبرضه شويه

كل سنه وانتي طيبه

شرفتي وآنستي :)
 

إرسال تعليق