الاثنين، 26 أبريل، 2010

بَـــدَوَّر..!!



بَـــدَوَّر
في الكلام كله

على كلمه

تبوح بالسر

تفضحني

ده كشف السر يفرحني

لأني طول م انا كاتمه

وضهري ع الدوام محني

***

وادَوَّر في الكلام كله

على كلمه

تكفي كل إحساسي

وتوصفني ولا تخلص

إلى ساسي ومن راسي

وتعلن للوجود كله

خبر حبي

وحبيبي في البعاد ناسي

وانا من شوقي وسهادي

حروفي تقول كلام وتعيد

وشعري ملو كراسي

***

وادَوَّر في الكلام كله

على كلمه

مداد البحر يكتبها

ولا يكفيش

عشان شايله على حروفها

سنين من كتر أحمالها

تحسها واقفه مبتمشيش

ليالي تاهت نجومها

ولا عمر القمر زارها

وفيها عششت خفافيش

***

وادَوَّر في الكلام كله

على كلمه

حروفها رسْـمَها نبضي

ومن جوفي

مدادها من صميم حسي

ومن خوفي

بخاف حبي يضيع مني

وتدبل بعدها حروفي

***

وادَوَّر في الكلام كله

على كلمه

توفي للغرام حقه

وتحكيله على حالي

وانا وحدي ومش وياه

بدور وسط إحساسي

على حبي..

ومش بلقاه

كأنه تاه

ما بين زحمه من الأحاسيس

وافكر إني راح أنساه

ولكن في ظلام يأسي

يشاور من بعيد ضيه

وقلبي يدق..

ويرسم في السما فرحه..

على دمعه..

ومليون آه

وبعرف إني طول عمري

مانيش ناسي

أنا فاكر..

وبستنــــــاه

***

6 هاه..إيه رأيك؟:

و ادور ف الكلام كله
على تعليق
و ما قدرتش
عشان انا من بالليل بدور على كلام يقول عن فكرة السر

السر قيمته ف انه سر بين اتنين
و لا ف ان طرفه باين و الشكوك و التساؤلات حواليه بتفرح الاتنين اصحاب السر

محمد
ربنا يباركلك ف قلمك
 
بدور وسط إحساسي

على حبي..

ومش بلقاه

كأنه تاه

ما بين زحمه من الأحاسيس

وافكر إني راح أنساه

ولكن في ظلام يأسي

يشاور من بعيد ضيه

وقلبي يدق..

ويرسم في السما فرحه..

على دمعه..

ومليون آه

لمستنى اوى الجزئية دى

كلها بجد رائعة تسلم اياديك واحساسك اللى كتب

ربنا يبارك فيك

اول زيارة وان شاء الله مش الاخيرة



"" لو تسمح ممكن اعمل الجزء ده تصميم وهابعتهولك اخد رأيك فيه قبل نشره ف مدونة التصميمات عندى

فكرة المدونة :انى باخد الجمل اللى بحسها اوى من كتابات زملائى المدونيين وبعملها تصميم لتشجيع الناس على الكتابة وف نفس الوقت بحس ان الصورة بتدى حياة للكلمات اكثر ماهى حية ..اذا سمحتلى اعمل الكلمات اللى انا اخدتها كوبى وبست ف تصميم لانى حسيتها اوى :)"
 
ســـهــــر

منوراني

ومش مصدق إن سهر صاحبة أحلى كلام مش لاقيه تعليق

ومن ناحية السر فلو السر ده حب بيبقى مش سر خالص

الصب تفضحه عيونه

وقيمته طبعا في إنه سر أصحابه بيفرحوا قوي لما كل الناس تعرفه ، سر مختلف عن كل الأسرار ، سر بنتمنى يتكتب في الجرايد

بس خلاص

على فكره أنا إسمي شــادي مش محمد :)

بس هاعديها عشان محمد ده إسم والدي الله يرحمه

مرحتيش بعيد يعني

نورتيني :)
 
мαησηα

منوره المدونه

وطبعا إنتي تاخدي الجزء اللي تحبيه وتعمليه كيفما تشائين :)

شرفتي المدونه

ويا رب دايما كتاباتي تلاقي استحسانك
 
السلام عليكم و رحمة الله

اولا : هاقولك على حاجة .. بس ما تضحكش
اصل و انا باقرأالتعليقات
لقيت سهر بتقولك : محمد

قلت ، هو غير اسمه امتى؟؟
انا آخر عهدى بيه كان اسمه شادى

قوم فى ردك لقيتك بتقولها اسمى شادى مش محمد
قلت الحمد لله ، اهم حاجة الثبات على المبدأ
ههههههههه

المهم
بجد القصيدة جميلة جدا
بس يا ترى ....
لقيت الكلمة و لا لسه؟؟

تحياتى
 
يااااااه

سول بذات نفسها عندنا

يا مراحب

(قلت ، هو غير اسمه امتى؟؟
انا آخر عهدى بيه كان اسمه شادى)


أغير إسمي؟!!!

لا منكن أبدا

أصلي اتعودت عليه بصراحه

بالنسبه للكلمه..

لسه ملقيتهاش..

ولسه بدور..!!


نورتيني :)
 

إرسال تعليق