الأحد، 9 مايو، 2010

مــعــــالــي الوزيــــــــر..!!



(زمن القراءه 5 -6 دقائق)

في يوم عادي جدا
من الصبح بدري
وأنا ع السرير
قوام بلغوني
قالولي مبارك بقيت الوزير
فرحت بصراحه
ده منصب وجاهه وعالي وكبير
ورحت الوزاره
وقلتلهم اني هارتب زياره
مفاجئه بصحيح
ومن غير دعايه وموكب وزيطه
لقريه صغيره
بعيده بغباوه ومش ع الخريطه
وصلت المحطه
فوجئت بحفاوه وشبه احتفال
زيارتي المفاجئه بقت كرنفال
فقلت اما نرجع حسابكم عسير
وأنا في الحقيقه
فرحت بوجاهتي
وكان ناقص إني أزغرد واطير
وبعلو صوتي وحماس كان مثير
قوام قلت إني
هاحل المشاكل وهيعم خير
هاتولي الشكاوى
جابولي شوال
وشايلينه سبعه شداد وتقال
وقلت اسألوني على أي شيء
لقيت هيصه جامده
ومليون سؤال
ده حتى العيال
بقالهم مطالب
يعيشوا فـ نضافه
وياكلوا كنافه
يشوفوا الزرافه
وساعة رجوعهم
يلاقوا جنينه وملعب كبير
في ركنه المضلل دكك أو حصير
وميه في زير
محوط بسور
عشان لما كوره
تطير غصب عنهم
متكسرش حاجه
لعم الزناتي بتاع العصير..!!

***

وده عم عبده اللي شغال غفير
عاوزله علاوه
عشان بنته زينب كبرت خلاص
وصبحت عروسه وعاوزه جهاز
وخلصت فلوسه عليها ولاص
وابنه عليوه مخلص علام
وأصبح مهندس كفاءه وتمام
ومش لاقي شغله..
بقاله النهارده شهرين وعام
وعاوز فخامة معالي الوزير
يعين عليوه مساعد غفير..!!

***

ودي أم فوزي
ولادها يتامى..وابوها ضرير
وهي وحـــيده
وراضيـــه وسعـــيده
بتزرع وتحصد وبتربي طير
ومحصول قيراطها مكفي العيال
وبيصونها من مر ذل السؤال
ولكن وفجأه القيراط الوحيد
بأى بحكم قاضي بتاع السفير
ولازم يبور
تقول طب عيالي
وابويا الضرير
يقولوا احنا مالنا
وده حكم قاضي
منفذ وماضي
مترغيش كتير..!!

***

وده عم صـــابر
مدرس كبير
مواطن في حاله وطيب أمير
كريم غصب عنه
كريم بالوراثه
وبرضه يا عيني
فقير بالوراثه وحاله عسير
في يوم لو تزوره
تحس إنه فجأه صبح مليونير
وده هو طبعه
ولو كان في ضيقه
وكان صعب وضعه
تلاقيه يكابر
وراضي وصابر
ويمشي فـ بلدهم كده حاجه تانيه
وآخر شياكه وحاطط كلونيا
كأنه الوزير
ودلوقتي باين في عينه انكسار
كلامه مغمس بقهر ومرار
بقاله النهارده عامين ع المعاش
ومعرفش يقبض
عشان بس غلطه
بطاقته القديمه
بها اسم أمه مدون سهير
وورق الحكومه
بيقول إن أمه بتدعى سمير..!!

***

ده حتى المحشش وعمره ما فاق
كاتبلي عريضه وشبه اتفاق
بيقول ليه يا باشا منعتوا الحشيش
بدور عليه ويقولولي مفيش
وطبعا سعادتك أكيد برضه عارف
وبالحال خبير
إن الحشيش ده بيعمل عجايب
ويمنع يا باشا مصايب كتير
بينسينا حالنا
ويمسح عقولنا
ونسمع خطبكم نقول يا سلام
يا محلى الكلام
بلدنا في خير
نعيش جوه حيطنا بكل التزام
تلاقينا دايما نشد الحزام
ورغم النوايب
بندفع ضرايب
ولو حتى بعنا الدولاب والسرير
بننسى با باشا إن فيه ناس سيادتك
بياخدوا فلوس اللي زيي وزيك
ومن خير بلدنا بيملوا زكايب
وليهم مواكب
ولابسين حرير
كأن اللي فيها محرم علينا
كده بين إيديهم
مبعتر وسايب
ولا مين يحاسب
ولا فيه ضمير
(ده هو اللي كاتب)
أما صحيح واد معفن حقير..!!

***

وآه ياني يابا
ويا رب دايما تعين الغلابه
ده إنت المعين
بقالي النهارده كده جمعتين
ببص فـ شكاوى مهيش ناويه تخلص
وكل أما احس إني ممكن أخلص
تزيد مره واحده وتملى الشوال
كأن اللي حاصل ده سحر وخيال
وجوا الشوال عفريتين م التقال
ومارد خطير
ده إيه اللي شقلب كيان البلد دي؟!!
وإيه المصير؟!!
ده دي قريه واحده
ومش ع الخريطه
وفيها مشاكل تحل فـ شهور
ما بالنا يغيرها..وغيرها كتير
مينفعش ليها ولا 100 وزير
وأنا بعد حيره وتفكير كتير
وعقلي خلاص كان مقرب يطير
رميت الشكاوى وكلام العيال
معنديش إجابه لمليون سؤال
وليكوا فـ رقبتي فقط إمضا واحده
كبيره وواضحه
على ورقه واحده
وفيها استقالة معالي الوزير..!!!

***



6 هاه..إيه رأيك؟:

ده حتى المحشش وعمره ما فاق
كاتبلي عريضه وشبه اتفاق
بيقول ليه يا باشا منعتوا الحشيش
بدور عليه ويقولولي مفيش
وطبعا سعادتك أكيد برضه عارف
وبالحال خبير
إن الحشيش ده بيعمل عجايب
ويمنع يا باشا مصايب كتير
بينسينا حالنا
ويمسح عقولنا
ونسمع خطبكم نقول يا سلام
يا محلى الكلام
بلدنا في خير
****************
رجعوا الحشيش...عشان ترجع تانى لمنصب الوزير
بلدنا فى خير اوى ومشكلتنا حتى الناس الكويسة بتستسلم فى اقرب فرصه
 
كيكى عوووووو

منوره المدونه

وطبعا بلدنا في خير

المشكله الرئيسيه عندنا ليست مشكلة موارد ولا إمكانيات ولا حتى عنصر بشري

المشكله مشكلة إداره ، في مصر لا تجد أبدا الرجل المناسب في المكان المناسب

ولو وجد ما تركوه!!!

****

شكرا لمرورك وتعليقك
 
ماشاء الله ماشاء الله
معالي الوزير..خلاص استقال
بيشرب عصير..ويكتب مقال
بيحكي معاناة..ويطرح سؤال
هو خد أمانات..لاقاهم تقال
مقدرش يتحمل..فقام استقال

طب اشمعنى يعني السيد "نظيف"؟
مراحش لا هو ولا السيد"شريف"؟
يكونو حاملين الأمانة وأنا اللي كفيف؟
معالي الوزير معالي الوزرير
ارجع وزارتك معالي الوزير
على الأقل بتحس مش بتدور كتير
هتمسح دموعنا،وتبكي معانا،
هتفضل تقول"بكرة"أحسن كتير
و لو مغيرتش الوضع الحقير
هتفضل أحسن من كل الحمير
ماسكين الدولة وبينهقو كتير
داوشينا بفرفهم،وفاكربنا حمير
معالي الوزير،ارجع وزراتك،بلاش الحمير

................
معالي الوزير،واحد من الناس..أذهلني تعبيرك وأسلووووووبك ...وأتشرف بأن أكون زائرة دائمة لمدونتك
بس يا معالي الوزير،متنساناش ..الكوسة حلوة برده
 
زائره

منوره المدونه طبعا

واشمعنى السيد نظيف ؟؟؟

معروفه طبعا اشمعنى

طويييييييييييييل والطول هيبه

واللي أطول منه يروح يمسك الوزاره

وابقوا قابلوني لو لقيتوا حد أطول منه

أما عني

فأنا خلاص قررت أن أعود إلى صفوف الجماهير

ولن أتراجع عن قراري

شوفيلك كوسايه غيري :)
 
سعادة الوزير
مش منه كتير
و رغم الحكايه
و حسن النوايا
لكنه دا قرر
ما ييجى منه خير
يمكن لانه ...........
و يمكن ...... لكنه
دا لازم يفكر / يغير شويه / و لو كان قليل

-------------------

شادى
النص بجد خرافى
روعه متناهيه
لا فاتتك الفكره و لا وقعت منك مزيكا و لمست الروح و العقل بقضايا كتير

يسلم قلمك
 
سهر

طبعا منوره المدونه

وطبعا معالي الوزير كان المفروض يحاول يغير

لكن أن بعبر عن يأس عام من القدره على التغيير طالما بقيت نفس الظروف ونفس الإداره الفاشله ونفس القوانين الغبيه والمطبقين لها الأغبى..إحم إحم

منوره مره تانيه

وشكرا لحضورك عندنا :)
 

إرسال تعليق