الاثنين، 7 مارس، 2011

اللي بـيـنـّـا يا مصر



اللي بينـّـا يا مصر

مش حلم عمري اللي اتسرق

في حماكي يا أم البشر

ولا شعر شاب قبل الصبا

علشان قاسيت البهدله

والمرمطه والعكننه والدلدله

وشفت العبر

ولا عمر فات

ماعرفش حتى فات في إيه

ولا أب مات

من غير ما تبكي ف يوم عليه

ولا شاب عاش

يرمي حياته في الخطر

علشان يصونك

يفدي بعمره فرحتك

ضحكة عيونك

نفسه يا مصر يطلعك

فوق في السما

نفسه الكرامه تنتصر

***

اللي بينـّـا مش أنا

والفرح مره في السنه

ولا ضهر عمره ما انحنى

صممتي إنه ينكسر

ولا تار أخويا اللي اتقتل

على مفرقك

ولا صوت غنايا اللي اتنبح

وانا باعشقك


ولا طول بكايا والسهر

***

اللي بينـّـا يا مصر

مش شعب عاش

ميت في حبك واتحسر

شافك بعينه

بكر طاهره بتغتصب

وحلمه إنه يحررك

من خوفه ولا مره قدر

***

اللي بينـّـا يا مصر

مش غربه في بلاد الجيران

ولا غلب ماعرف ملته

مكتوب علينا من زمان

ولا نور جبيني اللي انطفى

ولا بحر علمي اللي اتنفى

ولا شاب م الظلم انتحر


ولا طفل أول صرخته

ضايق جنابه بطلته

وشال الملامه وافتقر

اللي بينــّـا
مش ملامه

و حبة الناس اللمامه

صاحب الفخامه..

والرياده..

والزعامه..

والرخامه..

المتين المعتبر

مش هما دول أهلك..

فـــــــــشـــــــــــر

فشر اللي قال..

إنك ضعيفه..

أو مهانه..

أو جبانه..

أو بعتي ابنك بالرخيص

فشر اللي قالك

كتر أهلك

فقر طافح..وانتشر

دول حصن ليكي م العدا

هما حماكي والفدا

وصمام أمانك م الخطر

***

من صغري وبقولك بحبك

رغم ما فيكي بحبك

حبي ده أصلا قدر

علشان يا مصر
اللي ما بينــّـا

مش مصالح

مش بيت وأرض

و رحرحه وسكة سفر

ولا سهره ع النيل في الهوا

وضي القمر

ولا قصر عالي في السما

بيه افتخر

ولا شغل قيمه

و أجر باخده

ع الفكاكه والفكاهه والسمر

***

اللي بينــّـا يا مصر حب

مش قد عمري

ولا الحياه

ولا حد يوصل منتهاه

مش م اللي في قلوب البشر

ولا قد إنه يتوصف..

بكلام غرام

من اللي في الدنيا انتشر

***







14 هاه..إيه رأيك؟:

ماشاء الله جميلة

وبرغم بساطتها الا انها عميقه جدا
 
ماشاء الله رائعة رائعة جدا..
بالفعل مصر هذه بلد عجيبة ، تحبها رغم ما كانت عليه ، وأمجادها القديمة - والتي أتمنى أن تعود - تجعلك تفخر بها وتدافع عنها وإن كان قلبك يخفي أحيانا لوما لها..
وإن شاء الله لا لوم بعد الآن ، فنحن أدركنا جميعا أننا نحن من نصنع الأمجاد ونقرر التغيير..

جزيت الجنة..
معان رائعة جدا
وأرى أن مستوى كتاباتك الشعرية يزداد تحسنا في كل تدوينة ، ما ينقصك فقط هو التدقيق على عدم خروج بعض الكلمات وشذوذها عن الوزن
 
مش هقول غير كلمه واحدا
الله
قريتها وعيطت
حسره علي استشهدوا علشان نعلي راسنا
وبعد ماقربنا من تحقيق الهدف
جيين يتخانقوا دلوقتي
 
اللي بينــّـا يا مصر حب

مش قد عمري

ولا الحياه

ولا حد يوصل منتهاه
.........

حلوة جدا يا فنان
كلماتها تلقائية وبسيطة جدا وهو ده احلى ما فيها
 
شمس النهار

أهلا بيكي


أسعدني أنها أعجبتك

شكرا لك :)
 
قلم

أهلا أهلا

صحيح

نحن نصنع التغيير بالإخلاص والعمل

بالنسبه لخروج بعض الكلمات عن الوزن

أعرف ذلك

ربما لانشغالي أكتب بكثير من الإستعجال

سأحاول أن أحل المشكلة قريبا

شكرا لك :)
 
sony2000

أهلا بيكي

بالطبع حال مصر الآن يبكي

ولعنة الثورة المضادة محزن

لكننا ومصر أقوى من كل ذلك بإذن الله

أسعدتني زيارتك

شكرا لك :)
 
Hu-man

أهلا بك

وأشكرك جزيلا على ردك الرقيق

سعدت به حقا

شكرا لك :)
 
يا رب قدرنا نحمى بلدنا و نعليها
تحياتى
 
Crazy Nemo

أهلا بك

أسعدتني زيارتك

ويا رب يوفقنا نعمل اللي في مصلحة مصر

المشوار لسه طويل وصعب

نورت المدونه

شكرا لم :)
 
دعوة للأنضمام ألى جروب المدونين على الفيس اللينك
http://www.facebook.com/#!/home.php?sk=group_150308615029590&notif_t=group_activity
 
كلامك جميل فعلا والاجمل اننا نبني مصر جديده بايدينا
علشان اكيد اللي بينا حب

تقبل مروري
 
elsha3er

تم الإنضمام

شكرا لك
 
green eyes

أهلا بك

شكرا لردك الرقيق


نورتي المدونه
 

إرسال تعليق